Во 2014-та година, корисниците ќе продолжат да бидат заинтересирани претежно за таблети. Барем такви се предвидувањата на повеќето аналитичари, вклучувајќи ги и „IDC“ и „Gartner“. Сепак лаптопите се уште не се за занемарување, а оваа година тие ќе направат нов обид да ги придобијат луѓето, така што ќе бидат комбинирани со помоќен хардвер и поголема практичност.
За време на саемот „CES 2014“, што се одржа оваа недела во Лас Вегас, не малку компании ги претставија дел од новите модели на лаптопи и таблети, со кои ќе се борат за позиции на пазарот во оваа година. Најголемиот производител на компјутери „Lenovo“, на пример претстави прилично широк спектар и од двата типа на уреди.
Меѓу нив е таблетот „ThinkPad Tablet 8“. Тој е со 8-инчен „Full HD“ екран и се потпира на „Windows 8.1“ за својот оперативен систем. Уредот користи „Intel Atom Z3770 4 -core“ процесор, 2GB RAM меморија и ќе се нуди со до 128GB внатрешна меморија. Според компанијата таблетот ќе обезбедува околу 8 часа работа на батерија.
Лаптопот „Lenovo X1 Carbon“ пак ќе нуди хардвер од највисока класа, како и некои необични можности. Пример замена на „F“- копчињата на тастатурата со лента осетлива на допир, копчиња кои можат да ги менуваат своите функции според типот апликација која корисникот ја користи или по негова команда.
Компанијата ја задржува и популарната гама „Yoga“. Втората генерација лаптопи ќе користат „Intel Pentium“ процесор, 500GB хард диск и ќе се нудат во верзија со 11 и 13-инчни екрани.
Нови претставници.
„Toshiba“ пак ќе направи обид да влезе во сегментот на најевтиниот лаптоп-компјутер со својот „Toshiba Chromebook“. Лаптопот ќе користи „Chrome OS“ платформата на „Google“ и ќе е со 13,3-инчен екран. Хардверот е релативно скромен, но по цена од 279 долари, не може и да се бара многу.
Јапонската компанија ќе се потпира и на другата платформа на „Google“, „Android“, за својот нов 7-инчен таблет „Excite 7“. Цените ќе почнуваат од 99 долари. Целна публика му се ученици и деца, а хардверот е доволен за гледање филмови, сурфање на интернет и играње на повеќето нормални мобилни игри.
Кон битката на најевтиниот таблет се приклучи и „Acer“ со својот „Iconia B1-720“. Уредот има 1.3GH „dual-core“ процесор, 1GB RAM меморија, 16GB внатрешна меморија и цена од 129 долари. Се разбира, и овој модел се потпира на „Android“ за своја мобилна платформа.
Корејска моќ.
Иако „Samsung“ веќе е познат по своите мобилни телефони и таблети, компанијата не ги заборава и лаптопите. За време на „CES 2014“ таа го претстави новиот „Ativ Book 9“. Тој е со „Full HD“ екран со дијагонала од 15,6 инчи, ја користи последната генерација „Intel Core i5“ или i7 процесор и вградена „Intel 4400“ графичка картичка. Може да се нарача и со до 1 TB SSD за складирање на датотеки.
Сепак „Samsung“ не ги заборави и таблетите. Производителот претстави два нови модели – „Galaxy Note Pro“ и „Tab Pro“. И двата модели се насочени кон корисниците кои сакаат посериозен хардвер и подобри можности од таблетот. „Note Pro“ пример е со 12,2-инчен екран, а неговата резолуција е 2516х1600. Корисникот ќе може да користи големата површина за распределба на три самостојни екрани – личен, работен и за социјално вмрежување, како и да го прилагодува како сака.
Достапни се и бројни дополнителни апликации, како и можност за нивна употреба паралелно преку нивно отворање во прозорци. Оперативниот систем е „Android 4.4“, а од „Samsung“ сметаат дека со „Note Pro“ ќе може да им конкурира на лаптопите во функционалност. „RAM“ меморијата е 3GB, а процесорот е 4 -core „Snapdragon 800“ на „Qualcomm“. Цената на уредот ќе е доста висока, но засега останува непозната.
Коментари