Долгоочекуваното „dislike“ копче можеби и никогаш нема да се појави на „Facebook“, но еден од инженерите на компанијата изјави дека социјалната мрежа неформално експериментирала со алтернатива на копчето „like“, поточно „sympathize“.
Корисниците на „Facebook“ веќе со години бараат весели начини за брзо да реагираат на постовите на пријателите, но истакнувајќи дека „like“ копчето не е соодветно кога се пишува за прекинување на врска, смрт или лош ден.
Социјалната мрежа очигледно внимателно ги слуша своите корисници. Еден од инженерите, Ден Муриел го смислил копчето „sympathize“ кое би можело да се користи за постови кои не се толку весели.
Доколку некој би ја одбрал негативната емоција од фиксната листа на емоции на „Facebook“, копчето „like“ потоа би било пренаменето во „sympathize“.
Муриел додал дека ова решение било добро прифатено од колегите, но наскоро нема да биде применето.
