Една од најголемите заблуди во менаџментот е дека добрите лидери секогаш носат совршени одлуки. Во реалноста, такво нешто речиси не постои. Бизнисот е динамичен, пазарите се менуваат, клиентите имаат нови очекувања, а конкуренцијата секојдневно поставува нови стандарди. Во такви услови, ретко кој располага со сите информации потребни за да донесе „идеална“ одлука.
Сепак, низ годините сум забележал една појава која предизвикува многу поголема штета од погрешната проценка – неодлучноста.
Многу компании не губат затоа што направиле грешка, туку губат затоа што предолго чекале да донесат одлука.
Често сме сведоци на ситуации каде се организираат дополнителни состаноци, се бараат нови анализи, се чека уште едно мислење или уште еден извештај. Намерата е добра, а таа е да се намали ризикот. Но, во меѓувреме времето поминува, можностите исчезнуваат, а проблемите стануваат поголеми.
Во современиот бизнис, брзината е една од најважните конкурентски предности. Компаниите кои брзо се адаптираат и навремено реагираат имаат значително поголеми шанси за успех од оние кои постојано бараат дополнителна сигурност пред да направат чекор.
Тоа не значи дека треба да се носат непромислени одлуки. Напротив, анализата и подготовката се неопходни. Но постои тенка линија помеѓу внимателност и парализа од анализа.
Многу менаџери се плашат од можноста да згрешат. Стравуваат од критики, од одговорност или од последиците што може да произлезат од нивната одлука. Но токму тука лежи суштината на лидерството. Не во тоа секогаш да бидеш во право, туку да имаш храброст да преземеш одговорност кога нема гаранции.
Најдобрите лидери што сум ги запознал не биле луѓе кои никогаш не направиле грешка. Напротив, тие знаеле да донесат одлука, да ја следат нејзината реализација и доколку е потребно, брзо да ја коригираат насоката.
Погрешната одлука може да се поправи, изгубеното време многу потешко.
Особено денес, кога технолошките промени се случуваат со невидена брзина, компаниите кои предолго размислуваат, ризикуваат да останат чекор зад пазарот. Истото важи и за поединците. Често најголемата пречка за напредок не е недостатокот на знаење, искуство или ресурси, туку стравот да се направи првиот чекор.
Затоа верувам дека една од најважните особини на успешниот лидер е способноста навремено да донесе одлука. Не совршена, не без ризик, туку навремена.
Бидејќи во бизнисот, како и во животот, неодлучноста многу често е најскапата одлука од сите.
Бранко Стојкоски
