Секое второ семејство во Македонија кое има три деца живее во сиромаштија

Врз основа на податоците од Анкетата за приходите и условите за живеење, која се спроведува во согласност со препораките на Европската Унија, Државниот завод за статистика ги пресмета лаекенските индикатори за сиромаштија за 2024 година. Основа за пресметките на сиромаштијата се приходите, а прагот на сиромаштијата е дефиниран на 60 % од медијалниот еквивалентен приход. Податоците на државните статистичари велат дека во 2024 година, стапката на сиромашни лица во Македонија изнесувала 21.9 %.

Доколку се анализира  по типови домаќинства, стапката на сиромаштија на домаќинствата составени од двајца возрасни со две издржувани деца во 2024 година е 17.1%. Според најфреквентниот статус на економската активност, стапката на сиромашни вработени лица е 7.9 %, додека стапката на сиромашни пензионери е 12.0%. Коефициентот на Џини која е мерка за нееднаквоста во распределбата на приходите изнесува 29.2 %.

Податоците на ДЗС велат дека најголема сиромаштија е забележана во категоријата семејства со три или повеќе малолетни деца, односно тој процент изнесува 54,8 проценти. Потоа 45,8 отсто изнесува сиромаштијата кај групата самохран родител со деца, 28 отсто е стапката на сиромаштија кај самечки домаќинства со член помлад од 65 години.  Кај самиците сиромаштијата е на ниво од 27 отсто, кај мажите кои живеат сами 22 отсо. Потоа, 25 отсто сиромаштија кај домаќинста со издржувани деца а 16,8 отсто изнесува сиромаштијата кај домаќинствата кои немаат деца.

Останатите податоци од овој извештај за сиромаштија покажува и дека 7,8 отсто од вработените живеат во сиромаштија, кај невработените таа стапка е на ниво од 54,7 отсто, 12 отсто од пензионерите се во сиромаштија а дури 38 отсто  во сиромаштија живеат луѓе кои се во неактивни или несе во овие категории.

И.П