„Ford“ ги објави првите официјални фотографии и технички детали од најновата генерација на својата икона, пред презентацијата која денеска ќе се оддржи на манифестацијата „Go Further“ во Барселона.
Иако дизајнот на автомобилот се чуваше во тајност, списанијата кои ја следат авто-индустријата имаа за цел да предвидат како ќе изгледа новиот „Ford Mustang“. Меѓу нив беше и „Car&Driver“ кој на крајот на октомври објави убедливи компјутерски цртежи на „Mustang“ зa 2014-та.
Сепак, „Ford“ успеа до крај да го сокрие од јавноста конечниот изглед на овој автомобил.
Би било погрешно да се очекува дека компанијата ќе се одлучи за радикални промени во дизајнот во споредба со претставата која за „Mustang“ ја имаат повеќето љубители на овој модел. Поради тоа на прв поглед очигледно е дека пред вас е еден „Ford Mustang“.
Дизајнот кој е базиран на концептот „Ford Eos“ недвосмислено го одсликува карактерот на автомобилот – моќта и агресивноста.
Погледнете ја презентацијата на дизајнот на надворешноста на новиот „Ford Mustang“:
Новата маска на ладилникот, фаровите и предниот браник претставуваат освежување на предниот дел на „Mustang“ и му даваат аеродинамичен изглед.
Страничната силуета е слична како кај претходникот, а „В“ столбот сега е со црна боја и визуелно е вклопен со страничното стакло.
Задниот дел на автомобилот е изведен во класичен стил за „Mustang“, со триделни стоп светла и затемнета маска меѓу нив.
Покрај купе верзијата, „Ford“ објави фотографии и од кабриолетот кој има платнен покрив.
Американскиот производител тврди дека покривот се спушта два пати побрзо од претходната генерација на овој модел.
Дизајнот на внатрешноста го карактеризираат чисти, правоаголни линии и квалитетни материјали, меѓу кои доминира кожата.
Погледнете го видеото од презентацијата на ентериерот на новиот „Mustang“:
На купувачите ќе им бидат достапни најсовремените системи и технологии на „Ford“, како што се „Intelligent Access“, „SYNC“, „MyFord Touch“, „Track Apps“, „MyColor“ и новиот „Shaker Pro“ аудио систем.
Изборот на мотори опфаќа три погонски агрегати: 3.7 литарски V6 со 303 ks (223 kW) и 365 Nm, четирицилиндарски 2.3 литарски „EcoBoost“ со 309 ks (227 kW) и 406 Nm, и најмоќниот 5.0 литарски V8 кој испорачува 426 ks (313 kW) и располага со максимален вртежен момент од 528 Nm.
Според претходните најави, моторите во почеток ќе се комбинираат со шестстепен мануелен и шестстепен автоматски менувач. Во однос на претходникот, новиот „Mustang“ има подобрена задна суспензија и управувачки систем.
„Ford“ најави дека новиот „Mustang“ ќе се најде во продажните салони во САД во втората половина од 2014-та година, додека на купувачите во Европа овој модел ќе им биде понуден дури во 2015-та година.