Резултатите на „Morgan Stanley“ за првиот квартал ги надминаа проценките на аналитичарите, при што тргувањето со финансиски инструменти генерираше 1 милијарда долари повеќе приходи од очекуваното, објави „CNBC“.
Банката во соопштението во среда изјави дека нејзината заработка од јануари до март изнесувала 3,43 долари по акција, во споредба со очекуваните 3 долари по акција. Тоа се споредува со 4,3 милијарди долари, или 2,60 долари по акција, една година претходно. Приходите изнесувале 20,58 милијарди долари, во споредба со проценката од 19,72 милијарди долари. Една година претходно, тие изнесувале 17,7 милијарди долари.
Приходите од инвестициско банкарство на „Morgan Stanley“ се зголемиле за 36% на 2,12 милијарди долари, додека приходите од тргување со акции се зголемиле за 25% на 5,15 милијарди долари. Во меѓувреме, приходите од тргување со обврзници и други инструменти со фиксен приход скокнале за 29% на 3,36 милијарди долари.
Пазарите на акции беа нестабилни во првиот квартал поради загриженоста за промените предизвикани од вештачката интелигенција (ВИ) и војната меѓу САД и Израел во Иран. Ова можеби влијаело на надоместоците собрани од огромниот бизнис за управување со богатство на компанијата.
Ројтерс забележува дека по особено силната година за зделки во 2025-та година, водечките инвестициски банки очекуваат моментумот во спојувањата и аквизициите да продолжи оваа година. Поповолна регулаторна средина би можела да ги охрабри компаниите со големи парични резерви да го прошират својот бизнис преку аквизиции и спојувања и покрај заканите за глобалната економија поврзани со војната во Иран.
Глобалниот обем на зделки веќе достигна 1,38 трилиони долари во првиот квартал, според „Dealogic“, по речиси рекордната 2025-та година кога глобалните спојувања и аквизиции надминаа 4,81 трилиони долари.
Во исто време, зголемените тензии на Блискиот Исток ги потресоа пазарите на акции и го намалија апетитот за ризик, оптоварувајќи го пазарот на првична јавна понуда (IPO). Сепак, некои компании – особено во индустрискиот и одбранбениот сектор – продолжуваат да покажуваат интерес за котирање на берзите.
„Morgan Stanley“ е меѓу водечките банки во договорот за големата првична јавна понуда на „SpaceХ“, во која компанијата предводена од Илон Маск би можела да собере 75 милијарди долари со потенцијална проценка од 1,75 трилиони долари.
