Американскиот претседател Доналд Трамп им кажа на советниците дека е подготвен да ја заврши воената кампања против Иран дури и ако Ормутскиот теснец остане во голема мера затворен и ја остави сложената операција за негово повторно отворање за подоцнежен датум, објави „Wall Street Journal“ во понеделникот, повикувајќи се на претставници на администрацијата.
Ројтерс не можеше веднаш да го потврди извештајот.
Притисок врз Иран и префрлање на одговорноста на сојузниците
Доколку Иран не се согласи, според истиот извештај, Вашингтон ќе побара од своите сојузници во Европа и земјите од Персискиот Залив да ја преземат водечката улога во повторното отворање на Ормутскиот теснец.
WSJ, исто така, објавува дека Трамп и неговите советници процениле дека обидот за воено пробивање на тесниот морски премин би можел да го продолжи конфликтот надвор од планираниот временски рок од четири до шест недели.
Ормутскиот теснец е клучен за глобалното снабдување со нафта
Оценката доаѓа во време кога цените на енергијата нагло пораснаа низ целиот свет од почетокот на конфликтот, делумно поради фактот што Ормутскиот теснец – еден од најважните светски патишта за превоз на нафта – е практично блокиран по иранските одговори на нападите на САД и Израел.
Цената на нафтата вчера дополнително се зголеми и достигна околу 116 долари за барел, што е блиску до највисоките нивоа од почетокот на војната, пишува „Wall Street Journal“.
Да потсетиме дека Трамп вчера се закани дека американските сили ќе ги бомбардираат иранските електрани и постројки за десалинизација ако Техеран не постигне договор и не дозволи Ормутскиот теснец „веднаш да биде „отворен за бизнис“.
