Претседателот на САД, Доналд Трамп, во интервју за „Фајненшл тајмс“ објавено во неделата изјави дека сака да ја „земе иранската нафта“ и дека американските сили би можеле да го окупираат островот Харг, центарот на извозот на нафта на Иран, објавија Ројтерс и Би-Би-Си.
„Да бидам искрен, мојата омилена работа би била да ја земам нафтата во Иран, но некои глупави луѓе во САД велат: „Зошто го правите ова?“. Но, тие се глупави луѓе“, изјави американскиот претседател за „Фајненшл тајмс“.
Тој потег би можел да значи преземање на Харг, сигнализираше Трамп.
„Можеби ќе го земеме островот Харг, можеби нема. Имаме многу опции“, рече Трамп во интервјуто, истакнувајќи дека неговото преземање би значело подолгорочен престој на американските сили на островот, објави Би-Би-Си.
Кога беше прашан за одбранбените сили на Иран на островот, американскиот претседател рече дека мисли дека тие „воопшто немаат никаква одбрана“.
„Можеме многу лесно да го земеме Харг,“ рече Трамп.
Коментарите на претседателот дојдоа откако уште 3.500 американски војници пристигнаа на Блискиот Исток, поради растечките стравувања дека понатамошната ескалација би можела да ги изложи американските сили на ирански напади.
Трамп додаде дека индиректните преговори меѓу САД и Иран преку пакистански „емисари“ напредуваат добро, но одби да коментира дали е можно непосредно примирје.
„Договор може да се постигне доста брзо“, рече американскиот претседател во интервју, според извештајот на Би-Би-Си.
Веќе во средината на март, американските сили извршија голем напад врз Харг, погодувајќи над 90 ирански воени цели, објави во тоа време Централната команда на САД (CENTCOM).
Островот е на околу 500 километри северозападно од Ормутскиот теснец и е дом на најголемиот нафтен терминал во Иран, преку кој Техеран извезува 90 проценти од својата нафта.
