Европските берзански индекси денес беа претежно во пад, при што мајските фјучерси за сурова нафта од типот Брент скокнаа над 110 долари за барел откако неколку производители на енергија од Блискиот Исток објавија планови за намалување на производството, додека европските цени на гасот на берзата TTF во Амстердам се зголемија за повеќе од 20 проценти на околу 64 евра за мегават-час.
Обединетите Арапски Емирати, Кувајт и Ирак објавија дека ќе го намалат производството на енергенси по неколкудневното затворање на клучната транзитна рута за танкери низ Ормутскиот теснец поради војната меѓу Соединетите Американски Држави и Израел со Иран, објави CNBC.
Американскиот министер за енергетика Крис Рајт изјави во неделата дека сообраќајот низ теснецот ќе продолжи откако Вашингтон воено ќе ја оневозможи способноста на Техеран да го загрози транзитот на танкери низ рутата.
Во текот на викендот, иранските претставници го именуваа Моџтаба Хамнеи, син на починатиот врховен лидер ајатолахот Али Хамнеи, за нов лидер.
Израел претходно предупреди дека секој наследник на Хамнеи би можел да биде потенцијална цел, додека американскиот претседател Доналд Трамп се закани дека новиот лидер во Техеран ќе биде „краткотраен“ ако одлуката се донесе без негово одобрение.
Денес во 9:30 часот, индексот DAX на Франкфуртската берза падна за 2,46 проценти на 22.931,69 поени, францускиот CAC 40 за 2,74 проценти на 7.775,09 поени, британскиот FTSE 100 за 1,89 проценти на 10.093,20 поени, додека московскиот MOEX порасна за 1,42 проценти на 2.895,44 поени.
Вредноста на американскиот берзански индекс Dow Jones падна за 0,95 проценти на 47.501,55 поени, S&P 500 за 1,33 проценти на 6.740,02 поени, а вредноста на индексот Nasdaq за 1,59 проценти на 22.387,68 поени.
Цената на златото падна на 5.102,92 долари за тројанска унца, а цената на пченицата се искачи на 6,1515 долари за бушел (еден бушел е еднаков на 27,216 кг).
Вредноста на еврото во однос на доларот на FX берзата е 1,15552 долари, што е за 0,56 проценти помалку отколку на почетокот на тргувањето.
