Американскиот претприемач Илон Маск објави дека „SpaceX“ планира да гради градови на Месечината и Марс во наредните децении, и дека прво ќе се фокусираат на сателитот на Земјата.
„SpaceX веќе го префрли својот фокус на изградба на саморастечки град на Месечината, бидејќи потенцијално можеме да го постигнеме ова за помалку од 10 години, додека на Марс би биле потребни повеќе од 20 години“, напиша Маск на „X“.
Тој изјави дека компанијата „SpaceX“ планира да изгради град на Марс и ќе почне да го прави тоа за пет до седум години.
Маск истакна дека летовите до Марс би биле можни само во периоди кога планетите на Сончевиот систем се порамнуваат – на секои 26 месеци – и самото патување би траело шест месеци.
„Во исто време, ракетите до Месечината би можеле да се лансираат на секои десет дена, а самото патување би траело два дена, што би овозможило побрза изградба на град на сателитот на Земјата“, истакна Маск.
SpaceX е компанија за вселенска технологија основана од Маск во 2002 година.
