Пред пет години, „Meta Reels“ беше копија на „TikTok“ без приходи. Денес, се очекува услугата да донесе приходи споредливи со оние на „Coca-Cola“ и „Nike“, а компанијата планира да ја прошири на повеќе екрани до 2026-та година, објави „Wall Street Journal“.
Извршниот директор на „Meta Platforms“, Марк Цукрберг, за време на состанокот за финансиските резултати во октомври изјави дека „Instagram“ и „Facebook Reels“ ја надминале годишната пресвртница од 50 милијарди долари, што значи дека компанијата е на добар пат трајно да го достигне тој праг во следните 12 месеци. За споредба, аналитичарите очекуваат „YouTube“ оваа година да генерира 46 милијарди долари приходи од реклами, додека истражувачката фирма „eMarketer“ проценува дека „TikTok“ ќе оствари околу 17 милијарди долари.
Цукерберг заслугите ги припишува на системите за препораки управувани од вештачка интелигенција, кои, според него, испорачуваат подобра и порелевантна содржина на платформите на компанијата.
„Видеото е посебна сила“, рече тој, посочувајќи дека корисниците поминуваат 30 проценти повеќе време гледајќи видеа на „Instagram“ во споредба со претходната година.
Ова претставува радикална промена во однос на состојбата пред само неколку години, кога интерна студија на „Meta“ покажа дека „Instagram“ не успева да го имитира „TikTok“. Изненадени од успехот на видео-апликацијата, тогаш во сопственост на „ByteDance“, „Instagram“ го лансираше „Reels“ во август 2020-та година.
До 2022-ра година, корисниците на „Instagram“ поминуваа околу една десетина помалку време гледајќи „Reels“ отколку на „TikTok“. Еден интерен извештај наведува дека ангажманот на „Reels“ се намалил во последните четири недели и дека „повеќето корисници на ‘Reels’ воопшто не се ангажираат“.
Теса Лионс, потпретседателка за производи во „Instagram“, вели дека првиот предизвик бил да се утврди како кратките видеа да се интегрираат во апликација која првенствено била позната како место за објавување фотографии и поврзување со пријатели и креатори што корисниците ги следат.
Следниот чекор бил да им се помогне на луѓето да откријат „Reels“ од профили што дури и не ги следат.
„Ова е сосема поинаков предизвик за рангирање од начинот на кој првично размислувавме за прикажување на содржината“, вели таа во интервју.
Претходно, алгоритмот на „Instagram“ беше изграден околу мрежата на следење, прикажувајќи им на корисниците претежно објави од луѓе што ги следат – пријатели, познати личности или креатори. „TikTok“ го смени овој пристап, прикажувајќи видеа од профили што корисниците не ги следат и учејќи што им се допаѓа врз основа на времето поминато на секое видео.
„Instagram“ мораше да најде начин да ја совлада и оваа значително посложена задача.
Апликацијата се фокусираше на промовирање оригинална содржина и на плаќање креатори за објавување на платформата. Како што корисниците почнаа да поминуваат повеќе време скролајќи низ „Reels“, алгоритмот стануваше сè подобар во предвидувањето на нивните интереси.
Пет години подоцна, резултатите почнаа да се гледаат
Просечниот корисник на „Instagram“ денес поминува околу 27 минути дневно гледајќи „Reels“, додека корисниците на „YouTube Shorts“ поминуваат околу 21 минута, покажуваат податоците на истражувачката компанија „Sensor Tower“. („TikTok“ и понатаму води, со просек од 44 минути дневно поминати во скролање низ главниот фид)
Компанијата наведува дека „ја поминала пресвртницата“ и сега планира да го искористи овој моментум со лансирање на „Instagram“ за телевизори. Пред неколку недели, „Meta“ го направи првиот чекор во таа насока, лансирајќи тест-верзија на уредите „Amazon Fire TV“ во САД.
Лионс објаснува дека интерните истражувања покажуваат оти многу корисници веќе гледаат „Reels“ со пријатели, поврзувајќи го екранот на својот уред со телевизор.
„YouTube“ веќе постигна голем успех на телевизискиот пазар, станувајќи најгледан давател на видео содржини на телевизорите во САД минатата година. Денес, корисниците гледаат повеќе „YouTube“ на телевизори отколку на телефони или други уреди.
„Instagram“ сака дел од тој колач
Во април, компанијата лансираше функција наречена „Blend“, која им овозможува на корисниците да креираат персонализирани видео-канали врз основа на алгоритми и интересите на пријателите. Лионс вели дека ова го прави искуството на гледање поинтерактивно и посоцијално.
Минатиот месец, „Instagram“ претстави уште една нова функција која им овозможува на корисниците подиректно да контролираат каква содржина им прикажува алгоритмот, со јасно означување што сакаат, а што не сакаат да гледаат.
Лионс смета дека ова ќе биде клучно за проширувањето на платформата на телевизиските екрани.
„Кога сте пред телевизор, сакате едноставно да го изберете вистинскиот тип содржина, без разлика со кого сте“, вели таа.
