„Nvidia“ купува акции од 5 милијарди долари во „Intel“

„Nvidia“ купи акции на „Intel“ во вредност од 5 милијарди долари, соопшти американската компанија во понеделникот, со што го заокружи договорот објавен во септември, пренесува „Reuters“.

Водечкиот светски производител на чипови за вештачка интелигенција во септември соопшти дека ќе плати 23,82 долари по акција од обичните акции на „Intel“, во договор што се смета за значаен финансиски спас за производителот на чипови, по години стратешки промашувања и капитално интензивна експанзија на производствениот капацитет, која сериозно ги оптовари неговите финансии.

Највредната компанија во светот купила повеќе од 214,7 милиони акции на „Intel“ по цената утврдена во септемврискиот договор за приватна понуда, се наведува во извештајот објавен во понеделник.

Американските антимонополски регулатори ја одобриле инвестицијата на „Nvidia“ во „Intel“, според известувањето објавено од Федералната трговска комисија на САД претходно во декември.

По објавата, акциите на „Nvidia“ паднаа за 1,3% во претпазарното тргување, додека акциите на „Intel“ останаа речиси непроменети.