Руски суд ѝ наложи на домашната единица на „Raiffeisen Bank International AG“ да плати 339 милиони евра отштета, што е најновото во низата одлуки за принудна исплата од почетокот на минатата година.
Пресудата се однесува на отштета што ја бара „MKAO Rasperia Trading“, компанија порано во сопственост на санкционираниот бизнисмен Олег Дерипаска, која поседува 24% удел во градежната компанија „Strabag SE“.
Со ова, вкупната штета што ја должи „Raiffeisen“ е повеќе од 2,4 милијарди евра. Банката ќе издвои резерви за најновата пресуда во четвртиот квартал.
„Rasperia“ ги тужи „Strabag“ и нејзините главни австриски акционери за суспендирање на исплатата на дивиденда и други права поради европските санкции. Судот рече дека отштета може да се наплати од руската подружница на „Raiffeisen“, бидејќи еден од акционерите на „Strabag“ е исто така и најголемиот инвеститор во австриската банка.
Во посебна изјава, руската централна банка соопшти дека ќе бара отштета од европските банки во руски арбитражен суд за загуби предизвикани од потенцијално запленување на нејзините средства. Европските политички лидери дискутираат како да ги искористат замрзнатите руски средства во вредност од десетици милијарди евра за да ѝ помогнат на Украина во нејзината војна со Русија.
„Raiffeisen“ изјави дека главниот извршен директор Јохан Штробл ќе биде заменет од Михаел Хелерер следната година, што значи дека тешката задача за одвојување на руската единица на банката ќе му биде оставена на новиот лидер.
Одлуката на рускиот суд ефикасно ќе ја намали задржаната добивка на „Raiffeisen“ во Русија, која порасна на повеќе од 5 милијарди евра бидејќи на банката не ѝ е дозволено да исплаќа дивиденди надвор од земјата.
Акциите на австрискиот заемодавател паднаа за 3,7 проценти во четврток, што е најголем пад меѓу европските заемодаватели во банкарскиот под-индекс „Stoxx 600“.
„Raiffeisen“ изјави дека е неправедно вовлечен во спорот и вети дека ќе бара надомест преку европските судови. Банката изјави дека ќе се жали на пресудата.
