„iRobot“, компанијата што ги револуционизираше роботските правосмукалки на почетокот на векот со својот модел „Roomba“, поднесе барање за банкрот и предложи да ја предаде контролата на својот главен кинески добавувач, објави „Bloomberg“.
Производителот на роботи за широка потрошувачка со седиште во Масачусетс, кој моментално е јавно тргуван, ќе биде купен од „Shenzhen PICEA Robotics“, подружница на кинеската фирма, според соопштението за медиумите. Компанијата, основана во 1990-та година од инженери од Технолошкиот институт во Масачусетс, ќе ги изгуби своите обични акции според предложениот план од Поглавје 11, поднесен во Делавер во неделата.
„iRobot“ постигна почетен успех со „Roomba“, кој дебитираше во 2002-ра година и брзо стана синоним за автономни правосмукалки. Но, профитот за компанијата, која има продадено повеќе од 40 милиони домашни роботи, почна да опаѓа по пандемијата на Ковид, погодена од проблеми со синџирот на снабдување и поевтини конкуренти. Компанијата предупреди за потенцијален банкрот претходно овој месец.
Во 2022-ра година, „Amazon.com“ даде понуда што ќе ја променише среќата на компанијата, но таа не успеа поради конфликт со антимонополските власти на Европската Унија.
„iRobot“ доби надомест од повеќе од 90 милиони долари за неуспешниот договор, но дел од него беше искористен за плаќање на консултантски такси и за отплата на дел од заемот од 200 милиони долари обезбеден од „Carlyle Group“ како премостувачко финансирање до завршувањето на договорот со „Amazon“. Минатиот месец, „Santrum Hong Kong“, подружница на „Shenzhen PICEA“, купи 191 милион долари неплатен долг по главница и камата од американската инвестициска фирма, а „PICEA“ оттогаш е во преговори со „iRobot“ за обезбедување нов капитал и отплата на неплатениот долг.
Планот за банкрот ќе му овозможи на „iRobot“ да продолжи да работи и да ги исполнува своите обврски кон вработените, како и да врши навремени и целосни плаќања кон добавувачите и другите доверители за износи што се должат за време на процесот под судски надзор, се вели во соопштението на компанијата. Во поднесокот, компанијата наведе средства и обврски во вредност помеѓу 100 милиони и 500 милиони долари.
