„TikTok“, во сопственост на кинеската „ByteDance“, ќе инвестира повеќе од 200 милијарди реали (37,7 милијарди долари) во изградба на центар за податоци во Бразил, што е нејзин прв проект во Латинска Америка, објави „Bloomberg“.
„TikTok“ ќе соработува со развивачот на центри за податоци „Omnia“ и еден од водечките бразилски добавувачи на обновлива енергија „Casa dos Ventos“ на центар за податоци во североисточната држава Сеара, изјави Моника Гуиз, раководител на јавна политика во „TikTok Brazil“.
Проектот, кој ќе се развива во близина на индустриското пристаниште Песем, ќе се потпира целосно на чиста енергија од ветерни фарми, додаде таа.
„Ова е историска инвестиција за компанијата во Бразил. Ова е клучен чекор што ја одразува посветеноста на компанијата кон Бразил, еден од најдинамичните дигитални пазари во светот“, рече Гуиз на настан во Сеара со претседателот Луиз Инасио Лула да Силва.
Бразил се смета за најдобро позиционирана земја во регионот за да има корист од глобалниот бум во инвестициите во центри за податоци за напојување на вештачката интелигенција, бидејќи има изобилство од обновливи извори на енергија, меѓусебно поврзана национална електрична мрежа и најбрзи оптички кабли во регионот. Песем е близу до голем центар за подморски кабли што стигнуваат до градот Форталеза и обезбедуваат една од најкратките рути од Бразил до Европа и Африка.
Во интервју за локална телевизиска мрежа, Лула рече дека инвестицијата ќе предизвика „револуција овде во државата Сеара“.
