„HP Inc“ соопшти дека планира да отпушти помеѓу 4.000 и 6.000 работни места глобално до фискалната 2028-ма година, како дел од планот за поедноставување на операциите и распоредување на вештачка интелигенција за забрзување на развојот на производи, подобрување на задоволството на клиентите и зголемување на продуктивноста.
„Тимовите на „HP“ фокусирани на развој на производи, внатрешни операции и услуга на клиентите ќе бидат погодени од намалувањата“, изјави главниот извршен директор Енрике Лорес на прес-конференција.
„Очекуваме оваа иницијатива да резултира со заштеда од 1 милијарда долари во текот на три години“, додаде Лорес.
Во февруари, компанијата отпушти уште 1.000 до 2.000 вработени како дел од претходно објавен план за реструктуирање.
Побарувачката за компјутери напојувани со вештачка интелигенција продолжува да расте, сочинувајќи повеќе од 30% од испораките на „HP“ во четвртиот квартал до 31-ви октомври.
Зголемувањето на цените на мемориските чипови на глобално ниво, поттикнати од зголемената побарувачка од центрите за податоци, би можело да ги зголеми трошоците и да го намали профитот кај производителите на потрошувачка електроника како што се „HP“, „Dell“ и „Acer“, предупредија аналитичарите на „Morgan Stanley“.
Притисокот на големите технолошки компании за изградба на инфраструктура со вештачка интелигенција ги зголеми цените на „DRAM“ и „NAND“ чиповите, два најчесто користени типа меморија, во услови на жестока конкуренција на пазарот на сервери.
Лорес рече дека „HP“ очекува да го почувствува влијанието во втората половина од фискалната 2026-та година, со поголеми зголемувања на цените. „HP“ има изобилство од залихи за првата половина.
„Претпазлив пристап имаме кон нашите насоки за втората половина, додека преземаме агресивни мерки како што се одобрување на добавувачи со пониски трошоци, намалување на конфигурациите на меморијата и преземање мерки за одредување на цените“, рече Лорес.
Компанијата очекува прилагодена заработка по акција за фискалната 2026-та година помеѓу 2,90 и 3,20 долари, што е под просечната проценка на аналитичарите од 3,33 долари, според податоците собрани од „LSEG“.
