Во последниве неколку години, осигурителната индустрија во Македонија, особено во делот на неживотно осигурување, се соочува со сериозни предизвици во однос на профитабилноста. Иако е дел од финансискиот сектор, кој традиционално се смета за стабилен и исплатлив, реалноста за осигурителните компании е сосема поинаква.
Според податоците на Агенцијата за супервизија на осигурување (АСО), вкупниот профит на сите друштва за неживотно осигурување во 2024 година изнесувал околу 9 милиони евра. Како за споредба, една од помалите банки во земјата остварила добивка од над 9 милиони евра само во таа година.
Во Македонија моментално работат 11 друштва за неживотно осигурување. Тие обезбедуваат осигурување од автоодговорност, каско осигурување, осигурување на имот, патничко осигурување, приватно здравствено осигурување, осигурување од незгода и други типови на осигурување. Сепак, високите трошоци за продажните канали (особено преку брокерските куќи и банките), ниските премии и зголемениот број на штети, драстично влијаат врз нивната профитабилност.
Осигурителните компании честопати се натпреваруваат со цени, наместо со квалитет на услуга, што доведува до деструктивна конкуренција и пад на профитите. Дополнително, сè уште има недоволна финансиска писменост и ниска доверба кај граѓаните во осигурителниот систем, што придонесува за бавен раст на оваа индустрија.
Ако се спореди осигурителниот сектор со банкарскиот сектор, кој остварува повеќе од 200 милиони евра добивка годишно, станува јасно дека осигурувањето е маргинализиран сегмент. Повеќето компании во секторот работат со минимални маржи, а некои се дури и со загуби.
Ова отвора суштински прашања, дали моделот на неживотно осигурување во Македонија е одржлив на долг рок и дали е потребна темелна регулаторна и пазарна реформа која ќе го направи секторот поефикасен и попрофитабилен?
Редакцијата на Денар ќе продолжи да ја следи состојбата со осигурителниот пазар и ќе информира за сите понатамошни случувања, анализи и ставови.
С.Б.
