Новата трета генерација на современиот „MINI“ имаше премиера вчера во фабриката на овој производител во Оксфорд. Автомобилиот најпрво ќе биде достапен во верзии со три мотори и исто толку преносни системи, а продажбата ќе започне во пролетта 2014-та.
Растечкиот тренд на моделот „MINI“ продолжи и кај најновиот хечбек. Новата генерација е подолга за 98 mm и поширока за 44 mm од актуелната верзија, а меѓуосовинското растојание е зголемено за 42 mm.
Намалена е единствено висината на возилото и тоа за само 7 mm.
Зголемувањето на просторот во внатрешноста нема да се рефлектира само на комфорот на патниците. Просторот во багажникот исто така порасна на 211 литри, што е за 30 проценти повеќе во споредба со претходната генерација на овој автомобил.
Иако дизајнерски нема значајни промени, новиот „MINI“, според зборовите на луѓето од компанијата е „променет до темел“.
На купувачите на почетокот ќе им бидат достапни три мотори со турбо-полнење и со „Euro 6“ стандардите, како и со „stop-start“ технологијата.
„MINI Cooper“ под хаубата ќе има нов трицилиндарски 1.5 литарски „twin-turbo“ бензински мотор со 136 ks (100 kW) и 220 Nm максимален вртежен момент.
Според фабричките податоци, просечната потрошувачка во комбиниран режим со мануелен менувач ќе изнесува 4,5 l/100 km, a CO2 емисијата од 105 g/km. „MINI Cooper“ до „стотка“ ќе стигнува за 7.9 секунди, додека максималната брзина ќе изнесува 210 km/h.
Моделот „Cooper S“ ќе користи четирицилиндарски 2.0 литарски бензински агрегат со 192 ks (141 kW) и 279 Nm. Ако моторот се комбинира со мануелен менувач, автомобилот просечно ќе троши 5,7 l/100 km и ќе емитува во атмосферата 133 грама јаглерод-диоксид по километар.
Забрзувањето од 0 до 100 km/h ќе го постигнува за 6.8 s со максимална брзина од 235 km/h.
Единствениот дизел мотор во почетокот ќе биде новиот 1.5 литарски агрегат од типот „common-rail“ со директно вбризгување и со 116 ks (85 kW) и 270 Nm. Oвој мотор ќе се наоѓа во моделот „Cooper D“ кој е со просечна потрошувачка од 3,5 l/100 km и е најекономичниот од трите претставени автомобили. Тоа е и воедно и еколошки најприфатливиот агрегат со оглед дека неговата „CO2“ емисија изнесува 92 g/km.
„MINI Cooper D“ од мирување до брзината од 100 km/h забрзува за 9,2 s, додека максималната брзина на оваа верзија изнесува 205 km/h.
Моќта на моторот ќе се пренесува на предните тркала по пат на еден од трите понудени менувачи. Покрај стандардниот шестбрзински мануелен менувач, купувачите ќе можат да одберат и шестстепен автоматик кој е достапен во две изданија, од кои спортската верзија овозможува брза промена на степените на пренос, а брзините може да се менуваат и преку рачките на управувачот.
Палетата на мотори и семејството на новата генерација „MINI“ ќе бидат проширени во 2014-та година со основните модели „One“ и „One D“, како и со „Cooper SD“ и најмоќниот „John Cooper Works“.
Новиот „MINI“ ќе биде достапен со варијабилен систем на суспензија кој овозможува два начини на возење – „Comfort“ и „Sport“.
Моделите „Cooper“ и „Cooper D“ ќе бидат стандардно опремени со 15 инчни алуминиумски тркала, додека за „Cooper S“ се резервирани тркала од 16 инчни. Како опција во понудата ќе се најдат и 17 и 18 инчни алуминиумски тркала.
„MINI“ за 2014-та е поставен на платформата на „BMW“ – „UKL1“ и како што велат во компанијата, ова е првиот модел во својот сегмент кај кои фаровите и стоп-светлата во целост е применета „LED“ технологија.
Во внатрешноста на автомобилот имаше промени во однос на втората генерација кои најпрво се забележуваат во распонот на инструментите, но и во нивото на опрема. Наместо на централниот дел на командната табла, брзинометарот сега се наоѓа директно пред возачот.
Во побогатите пакети на опрема на купувачите ќе им биде достапен и 8.8 инчен екран за мултимедијалниот уред кој е сличен како „BMW – iDrive“ системот. Покрај тоа, кабината на новиот „MINI“ е опремена и со поквалитетни материјали во споредба со претходната верзија на ова возило.
Новиот „MINI“ ќе пристигне во продажните салони во пролетта 2014-та година. Почетната цена во Велика Британија за „MINI Cooper“ ќе изнесува 15.300 фунти (18.200 евра), зa „Cooper D“ 16.450 фунти (19.600 евра). Најскапиот „MINI“, моделот „Cooper S“ ќе чини од 18.650 фунти (22.200 евра).
Какви се вашите први впечатоци од новиот „MINI“?
