Американскиот претседател Доналд Трамп изјави дека веројатно ќе побара од Иран да ја запре својата нуклеарна програма за време на разговорите следната недела, додавајќи дека војната меѓу Израел и Техеран брзо завршила благодарение на американските напади врз Иран.
Трамп рече дека неговата одлука да употреби бомби за разбивање бункери во нападот во неделата ја уништила нуклеарната програма на Иран, додавајќи дека тоа е „победа за сите“.
„Тоа беше тотално уништување“, рече тој, отфрлајќи ја првичната проценка на американската Агенција за одбранбено разузнавање дека на Иран ќе му требаат само неколку недели за да ја обнови својата нуклеарна програма.
Трамп на самитот на НАТО во Хаг изјави дека не мисли оти Иран повторно ќе се обиде да развие нуклеарно оружје. Техеран со децении ги негира обвинувањата од западните лидери дека се стреми да произведе нуклеарно оружје.
„Следната недела ќе разговараме со Иран. Можеби ќе потпишеме договор. Не знам. Не мислам дека е потребно“, рече Трамп.
Директорот на ЦИА, Џон Ратклиф, подоцна изјави дека доверливи разузнавачки информации укажуваат дека нуклеарната програма на Иран претрпела значителна штета во неодамнешните американски напади, но не кажа дека таа е уништена.
„Новите разузнавачки информации од историски сигурен и точен извор/метод покажуваат дека неколку клучни ирански нуклеарни постројки се уништени и дека ќе поминат години пред да бидат обновени“, рече Ратклиф.
Израелската нуклеарна агенција процени дека нападите „ја вратиле способноста на Иран да развива нуклеарно оружје за многу години назад“. Белата куќа, исто така, ја пренесе израелската проценка, иако Трамп рече дека не се потпира на израелските разузнавачки информации.
Трамп рече дека е уверен дека Техеран ќе продолжи да се стреми кон дипломатски пат кон помирување. Тој не даде детали за тоа каде треба да се одржат разговорите следната недела или кој треба да учествува.
Доколку Иран се обиде повторно да ја воспостави својата нуклеарна програма, „ние нема да го дозволиме тоа“, рече тој.
