Реакторот Кондаб, порано познат како Арак, првично беше дизајниран за производство на плутониум што може да се користи за производство на нуклеарно оружје, иако Техеран постојано негира дека развива такво оружје.
Израелската војска го погоди истражувачкиот реактор за тешка вода во Кондаб, кој сè уште е во изградба, а исто така оштети и блиска постројка за производство на тешка вода, објави денес Меѓународната агенција за атомска енергија (IAEA).
Израел претходно изврши напади врз неколку нуклеарни постројки во Иран. Реакторот Кондаб, порано познат како Арак, првично беше дизајниран за производство на плутониум што може да се користи за производство на нуклеарно оружје, иако Техеран постојано негира дека развива такво оружје.
Според договорот на Иран со светските сили од 2015 година, реакторот беше реконструиран за да се намали ризикот од развој на нуклеарно оружје – оригиналното јадро беше отстрането и исполнето со бетон. Иран ја информираше IAEA со седиште во Виена дека планира повторно да го пушти реакторот во функција до 2026 година.
„IAEA има информации дека бил погоден истражувачки реактор за тешка вода Кондаб, поранешен Арак, кој сè уште е во изградба. Тој не бил оперативен и не содржел нуклеарен материјал, па затоа немало радиолошки последици“, соопшти IAEA на мрежата X.
Реакторите за тешка вода користат деутериум оксид (познат како тешка вода) за да ги забават брзите неутрони ослободени за време на нуклеарната фисија за да генерираат топлина во реакторот.
Во првичното соопштение, IAEA соопшти дека нема докази дека нападот оштетил блиска постројка за тешка вода. Сепак, подоцна објави ревидирани информации.
„Иако првично не беше забележана никаква штета на блиската фабрика за тешка вода, сега се проценува дека клучните објекти се оштетени, вклучително и единицата за дестилација“, соопшти агенцијата.
