TikTok доби уште едно продолжување од Белата куќа, бидејќи претседателот Доналд Трамп планира да го одложи спроведувањето на законот „продај или забрани“ за дополнителни 90 дена.
-Претседателот Трамп ќе потпише дополнителна извршна наредба оваа недела за да продолжи да работи TikTok – изјави Каролин Ливит, портпаролка на Белата куќа.
-Како што кажа многу пати, претседателот Трамп не сака TikTok да пропадне. Ова продолжување ќе трае 90 дена, а администрацијата ќе го искористи тој период за да се осигури дека договорот е завршен, така што американските граѓани ќе можат да продолжат да го користат TikTok со доверба дека нивните податоци се заштитени и безбедни, додаде таа.
Си-Ен-Ен објави дека контактирала со кинеската компанија ByteDance, сопственикот на TikTok, за коментар во врска со објавата.
За потсетување, поминаа околу пет месеци откако технички стапи на сила законот со кој се бара забрана за TikTok во Соединетите Држави, освен ако не го продаде неговата кинеска матична компанија.
Сепак, благодарение на постојаните ветувања на претседателот Трамп дека законот сè уште нема да се спроведе, ниту продажбата ниту забраната сè уште не се случија – освен приближно 14-часовното суспендирање на апликацијата во јануари.
Соопштението што беше објавено денес претставува трето официјално продолжување на рокот од страна на Трамп, додека преговорите во врска со продажбата на TikTok на американска компанија сè уште се водат во позадина, објавува Telegraph.
