Смртоносниот конфликт меѓу Израел и Иран влезе во својот четврти ден, при што двете страни ги засилија своите напади. Во текот на ноќта, Иран нападна израелска рафинерија за нафта и оштети дел од електричната мрежа. Експлозии се случија во Израел, а погодени беа и станбени згради. Бенјамин Нетанјаху се обрати до јавноста: „Израел има две цели во Иран“.
Цивилите се преплашени, а бројот на жртви се зголемува. Од почетокот на непријателствата, во Израел загинаа 24 лица, а во Иран 224 лица. Жителите на Техеран се обидуваат да го напуштат главниот град во потрага по безбедност. Иранските медиуми известуваат за нови израелски напади врз западниот дел на Иран.
Во исто време, Си-Ен-Ен објави дека двајца американски претставници изјавиле дека претседателот Доналд Трамп го отфрлил израелскиот план за атентат врз врховниот лидер на Иран, ајатолахот Али Хамнеи. Израелскиот премиер Бенјамин Нетанјаху негираше дека постои таков план.
Се очекува американскиот претседател Доналд Трамп да му даде на Иран „последна шанса“, изјавија американски и европски претставници за „Џерусалем пост“.
Еден функционер додаде дека предлогот можеби е дури и малку подобар од претходниот што администрацијата им го достави на Иранците пред околу една и пол недела.
Убиството на ајатолахот Али Хамнеи би „го завршило конфликтот“ меѓу Израел и Иран, изјави израелскиот премиер Бенјамин Нетанјаху во интервју за американската телевизиска станица АБЦ.
„Тоа нема да доведе до ескалација на конфликтот, туку до крај на конфликтот“, рече Нетанјаху како одговор на новинарско прашање за противењето на американскиот претседател Доналд Трамп на израелскиот план насочен кон елиминирање на врховниот лидер на Иран.
На прашањето дали Израел навистина ќе го нападне Хамнеи, израелскиот премиер рече дека неговата земја „прави она што мора да го направи“.
Конфликтот Иран-Израел влезе во својот четврти ден и не покажува знаци на смирување.
