Од денес невработените граѓани од Македонија ќе имаат можност да аплицираат за дел од мерките од Оперативниот план за вработување. Според информациите на Денар, целокупната документација е средена, административните процедури се завршени, и сега во Агенцијата за вработување ќе ги чекаат апликациите на невработени граѓани. Станува збор за 40 милиони евра, кои треба да се распределат на околу 16 илјади граѓани.
Што велат процедурите, кандидатите најпрво ќе треба да пополнат прашалник во Агенцијата за вработување кој соодржи одредени прашања по кои кандидатот се бодува. Втората фаза е изработка на бизнис план, и комисија од повеќе државни институции ќе треба да одлучат дали планот е конкурентен и заслужува да се поддржи со државни пари. Обврските на невработените лица кои ќе основаат сопствен бизнис преку овие мерки ќе треба две години да имаат обрт на средства преку нивната сметка. Тоа значи дека потребно е да се има економска активност и минимално што се бара тие да исплаќаат плата и придонеси за себе или ако се партнери за двајцата. Доколку тоа не е така, и нема економска активност, надлежните ќе може да го раскинат договорот и да се бараат парите да бидат вратени. Ако немаат пари да вратат се пристапува кон судска постапка и последниот збор ќе го има судот.
„Оперативниот план за 2025 година има многу измени и новини во однос на претходните, како по својот опфат и обем на некоја од мерките, така и преку воведување на нови мерки. Кај најпопуларната мерка за самовработување, поддршката е зголемена од 6.000 на 7.000 евра евра неповратни средства за започнување на бизнис, што е за 1.000 евра повеќе споредено со претходната година. Новина во оваа мерка е што за млади лица до 29 години, истата изнесува до 10.000 евра. Овој износ е рекорден досега и е точно таргетиран за млади лица до 29 години со цел да се мотивираат својот претприемнички талент да го реализираат во државата“, велат од министерството за економија.
Пресметките велат дека споредбено со минатата 2024 година, Владата го зголеми износот за 7,5 милиони евра. Со Оперативниот план фокус се става на младите и невработените лица со што надлежните велат дека тоа е врвен приоритет за намалување на невработеноста преку креирање и отворање на нови работни места за граѓаните. Она што веќа е познато е дека Оперативниот план опфаќа три категории и тоа, млади лица коишто преку овие мерки треба да останат во државата, невработени лица и лица корисници на гарантирана минимална помош со што целата е да се подобри животен стандард на граѓаните.
И.П
