Додека светот се свртува кон Ватикан со прашањето кој ќе биде следниот папа, зад затворените врати на Систинската капела, се одржува процес познат како конклава – долг, таен и, се покажа, доста скап настан.
Кога кардиналите не успеваат брзо да се договорат за избор на нов поглавар на Католичката црква, трошоците растат од ден на ден.
Овој процес вклучува:
- Сместување за над 100 кардинали во Домот на Света Марта во Ватикан,
- Обезбедување на приватност и безбедност (вклучувајќи блокирање на сигналот, техничка заштита, дополнителен персонал),
- Оброци и логистика (кујна, чистачи, транспорт),
- Церемонијални и технички трошоци во Систинската капела (на пр. познатата печка за чад).
Проценките за трошоците дневно варираат, но експертите веруваат дека износот од 50.000 до 75.000 евра дневно е реален. Значи, ако конклавата трае 10 дена, вкупните трошоци можат да надминат 700.000 евра. Ако е потребно еден месец – што не е невозможно – бројката се зголемува на 2 до 2,5 милиони евра.
Најдолгите папски избори се одржале во 1268–1271 година во Витербо, кога на Црквата ѝ беа потребни 2 години и 9 месеци за да го избере папата Григориј X. Ситуацијата била толку екстремна што локалните власти ги затворија кардиналите, им ги намалија оброците, па дури и го отстранија покривот од просторијата за да ги принудат да се договорат.
Секако, тоа не би се случило денес, но секоја недела без папа си има своја цена. Покрај оперативните трошоци, постои и невидлива економска загуба: нефункционална Курија, застој во донесувањето одлуки за финансиите на Црквата, како и пад на донациите и инвестициите поради неизвесност.
Ако конклавата симболично делува како аскетски чин, зад сцената се ангажирани десетици луѓе и голема организација. Сикстинската капела е технички подготвена месеци пред конклавата: инсталирани се електронски блокирачи, безбедносни системи, печки за чад, уреди за гласање и стерилни комуникациски системи.
Проценките велат дека целата организација на конклавата може да чини помеѓу 1,5 и 3 милиони евра, во зависност од времетраењето.
Ватикан можеби не плаќа даноци, но трошоците за избор на нов поглавар на Црквата воопшто не се симболични. Секој ден без папа во денешниот свет ја чини Црквата и финансиски и политички. И додека милиони верници чекаат бел чад, милиони евра полека исчезнуваат во сенката на куполата на Свети Петар.
