Акциите на Гугл денес нагло паднаа откако висок извршен директор на Apple изјави на судско рочиште дека бројот на пребарувања на Google на мобилниот прелистувач Safari се намалил за прв пат во април.
Еди Кју, потпретседател на Apple задолжен за услуги, ги презентираше информациите за време на антимонополската парница што се води против бизнисот за интернет пребарување на Alphabet, матичната компанија на Google, објави порталот Investors.com.
За акционерите на Alphabet, бизнисот за интернет пребарување долго време е извор на загриженост, особено поради конкуренцијата управувана од вештачка интелигенција, како што е ChatGPT на OpenAI и други слични платформи. ChatGPT нуди директни одговори на прашањата на корисниците, додека бизнис моделот на Google се базира на прикажување врски до веб-страници.
Google му плаќа на Apple 20 милијарди долари годишно за да биде „стандарден прелистувач“ на iPhone. Во денешното тргување, акциите на Google паднаа за повеќе од 8 проценти и затворија на 149,09 долари, додека акциите на Apple паднаа за 1,8 проценти на 194,94 долари.
Министерството за правда на САД моментално води антимонополска тужба против Google поради неговата доминација во интернет пребарувањето. Федералниот судија Амит Мехта минатата година пресуди дека Alphabet нелегално одржува монопол врз услугите за онлајн пребарување и со тоа ги спречува конкурентите да развиваат свои производи.
Клучен дел од пресудата се однесува на плаќањата што Google ги прави на Apple за да остане стандарден пребарувач на iPhone. Кју ги даде своите коментари за време на сослушувањето фокусирано на можните антимонополски мерки, објави Bloomberg.
Се очекува судијата Мехта да донесе одлука за потенцијалните казни за Google до август. Министерството за правда бара Google да биде принуден да го продаде својот прелистувач Chrome и да преземе други мерки, кои би можеле да вклучуваат промени во договорот со Apple.
Во меѓувреме, Кју, исто така, сведочеше дека Apple размислува да додаде пребарување базирано на вештачка интелигенција во својот прелистувач Safari, објави Telegraph.
Извршниот директор на Alphabet, Сундар Пичаи, минатата недела изјави дека се надева дека ќе склучи договор за лиценцирање со Apple за да ја користи неговата платформа Gemini AI.
