Американскиот претседател Доналд Трамп во објава на социјалните мрежи во неделата го најави отворањето на Алкатраз, озлогласен поранешен затвор, кој ќе служи како место за „најсуровите и најнасилните криминалци во Америка“.
„Им наложувам на Бирото за затвори, заедно со Министерството за правда, ФБИ и секретарот за внатрешна безбедност, повторно да го отворат значително проширениот и реновиран Алкатраз за да ги сместат најсуровите и најнасилните криминалци во Америка. Повеќе нема да бидеме заложници на криминалци, бандити и судии кои се плашат да си ја работат работата и нема да ни дозволат да ги отстрануваме криминалците кои нелегално влегле во нашата земја“, напиша Трамп во објава на мрежата Truth Social.
„Повторното отворање на Алкатраз ќе служи како симбол на закон, ред и правда“, додаде тој.
Трамп им рече на новинарите, по враќањето во Белата куќа подоцна истиот ден, дека тоа е „само идеја“ што му паднала на ум поради „радикализираните судии“ кои сакаат да обезбедат мигрантите да имаат право на фер судење кога се депортирани, според Си-Ен-Ен.
„Претпоставувам дека овие радикализирани судии сакаат судење за… секое лице кое е нелегално во нашата земја“, рече тој, додавајќи дека „тоа би значело милиони судења“.
Трамп рече дека Алкатраз „бил тажен симбол, но е симбол на законот и редот“.
„И знаете, има прилично богата историја, искрено, па мислам дека ќе го направиме тоа“, вели првиот човек на САД.
Алкатраз, кој се наоѓа на остров покрај брегот на Сан Франциско, функционирал како федерален затвор речиси 30 години пред да биде затворен во 1963 година „бидејќи институцијата била премногу скапа за да продолжи да работи“, според веб-страницата на Бирото за затвори. Проценката беше дека ќе бидат потребни помеѓу три и пет милиони долари „само за реставрација и одржување за да се одржи затворот отворен“, не вклучувајќи ги секојдневните оперативни трошоци. Алкатраз бил речиси три пати поскап за управување од кој било друг федерален затвор, според веб-страницата.
Алкатраз беше прогласен за Национален историски споменик во 1986 година, а денес е под управување на Националната служба за паркови. Околу 1,2 милиони луѓе ја посетуваат оваа туристичка атракција годишно.
