Најавата на премиерот Христијан Мицкоски за воведување бесплатен софтвер и мобилна апликација за споредба на цените на производи во маркетите предизвика низа реакции во јавноста.
Целта на проектот, како што рече премиерот, е да им се помогне на граѓаните полесно да го најдат најевтиниот производ, а трговците да се натпреваруваат со пониски цени.
„Ќе направиме софтвер и законски измени за да мора трговците да го користат софтверот. Сакаме да направиме и апликација за паметните телефони за граѓаните да можат да лоцираат маркети и да направат споредба на цените“, изјави Мицкоски.
Идејата, која сè уште е во фаза на најави, предизвика поделени мислења кај јавноста.
Додека едни ја поздравуваат како чекор напред во дигитализацијата и заштитата на потрошувачите, други се сомневаат во нејзината ефикасност и искрените намери зад неа.
Граѓаните сакаат контрола, не само информации
„Апликацијата ќе биде корисна ако ја ажурираат редовно. Јас секој ден споредувам цени во три маркети, ова ќе ми заштеди време. Ама, дали ќе биде реално или само чист маркетинг?“, прашува Марина Стојанова од Скопје.
Слично размислува и Петар Иванов од Битола, ИТ инженер:
„Технички е возможно, и јас можам да направам таква апликација. Но, кој ќе гарантира дека податоците се точни? Треба механизам на контрола и казна ако некој внесува лажни цени.“
Пензионерот Љупчо Крстевски од Штип смета дека не сите граѓани ќе имаат бенефит:
„За нас постарите, многу е покорисно да има поевтини производи во локалниот маркет, отколку информација дека два километри подалеку нешто е за 5 денари поевтино“.
Експертите предупредуваат: потребна е поширока стратегија
Економистите ја гледаат најавената мерка како делумен чекор во борбата против високите цени.
„Треба законска обврска, како што најави Мицкоски, но и независна институција што ќе го следи внесот на податоци и ќе реагира кога има неправилности. Без тоа, ќе биде уште еден проект што ќе згасне по една година“, коментираат познавачите.
Сопственик на локален маркет во Велес, вели дека иако е за транспарентност, ова ќе донесе притисок:
„Ако некој маркет има ниски цени затоа што купува од нелегален канал, тогаш и јас ќе мора да намалам, а тоа значи помал профит. Ќе треба надзор и кај добавувачите, не само кај нас“.
Според Мицкоски, платформата ќе биде достапна на македонски и албански јазик, ќе содржи мапа со локации на маркети, филтри според производи, брендови и типови на продавници, а целата иницијатива ќе биде финансирана со државни средства.
Додека јавноста чека повеќе детали и временска рамка за реализација, јасно е дека очекувањата се високи.
Но, уште појасно е дека вистинскиот предизвик ќе биде не во создавањето на апликацијата, туку во тоа како реално ќе функционира – во услови на пазар каде што недовербата е постојано присутна.
Б.З.М.
