Бурата во САД не стивнува – откако ролеркостерот со царини што ги најави Доналд Трамп, па паузираше, доведувајќи ги пазарите во невротична состојба која некогаш паѓаше, некогаш растеше, вчера внимание привлекуваше еден детаљ. Имено, Трамп на својот профил на Truth Social, неколку часа пред да ги паузира на 90 дена најавените тарифи напиша: „Сега е добро време за купување!“ (со големи букви и со три извичничи: „THIS IS A GREAT TIME TO BUY!!!“) во 9:37 часот, сигнализирајќи им на бизнисмените да купат акции на берзата кои ја изгубија вредноста бидејќи најверојатно наскоро ќе добијат на вредност.
Тоа, се разбира, се случи кога Трамп го објави замрзнувањето на царините четири часа подоцна, а акциите вртоглаво пораснаа, а оние што го слушаа и купуваа веднаш по неговото објавување, профитираа енормно.
Акциите пораснаа за 9,5 отсто во доцното тргување, а пазарот, мерено со индексот S&P 500, поврати околу 4 трилиони долари, или 70 отсто од вредноста што ја загуби во претходните четири трговски дена, според Time.
Сега се поставува прашањето – дали беше легално? Дали Трамп свесно манипулираше со пазарот, односно правеше „инсајдерска трговија“? Инсајдерска трговија се смета за тргување кога некој има информации кои не се јавно достапни, но се познати само на тесен круг на луѓе.
Во овој случај, веста дека царините ќе доцнат 90 дена ја знаеше само една личност – самиот Трамп. А за работата да биде уште полоша, има и видео од Белата куќа, каде Трамп триумфално наведува кој од неговите пријатели колку заработил од оваа „игра на зборови“. Се огласија и демократите, па се појави видео со Александрија Окасио-Кортез (Alexandria Ocasio-Córtez), каде таа во интервју го поставува прашањето за законитоста на таквиот потег. Доколку не е законски, тогаш може да следи кривична постапка.
Во објава на мрежата X, Александрија Окасио-Кортез во средата истакна дека членовите на Конгресот имаат рок до 15 мај да ги поднесат своите финансиски извештаи.
„Секој член на Конгресот кој купил акции во последните 48 часа веројатно треба да го открие тоа сега“, рече таа, според NBC News. Да потсетиме дека ликот кој го толкуваше Чарли Шин во првиот дел од филмот Wall Street беше обвинет и осуден за инсајдерска трговија.
Ричард Пејнтер, поранешен етички адвокат во Белата куќа, изјави за Дојче веле дека треба да се отвори истрага за да се утврди „кој знаел каков е тарифниот план на претседателот и дали некој тргува со тие информации. Претседателот штотуку создаде изглед на пазарна манипулација и дека може да има инсајдерска трговија кога зборува за купување и продавање акции во исто време кога зборува за американската трговска политика“, рече Пејнтер.
Запрашан дали е погрешно или можеби дури и незаконски, Пејнтер истакна дека тоа е секако „без преседан“.
Сенаторите Адам Шиф (Калифорнија) и Рубен Галего (Аризона) испратија писмо до Белата куќа во средата, барајќи „итна истрага за тоа дали претседателот Трамп, неговото семејство или другите членови на администрацијата се вклучени во инсајдерска трговија или други нелегални финансиски трансакции, или дали биле информирани врз основа на сознанија за тоа што ќе се случи однапред“ за промената во неговата царинска политика.
Сенаторката Елизабет Ворен, демократ од Масачусетс, исто така повика на истрага, прашувајќи го Конгресот дали станува збор за „корупција на очигледен поглед“, според NPR.
Друг куриозитет на објавата беше потписот на Трамп со неговите иницијали, DJT. DJT е исто така симбол на акции на Trump Media and Technology Group, матичната компанија на платформата за социјални медиуми на претседателот Truth Social. Некои велат дека Трамп го напишал ова во самоодбрана, бидејќи сега може да каже дека е „сега е време да се купите на DJT“. Нејзините акции скокнаа за цели 22,67 отсто.
Конечно, интересно е и мислењето на „Волкот од Волстрит“, Џордан Белфорт. Познатиот измамник, овековечен од Леонардо ди Каприо, изјави за Скај њуз дека немало тргување со инсајдери: „Јас лично не мислам дека тоа е премногу сомнително. Особено што им кажа на сите, на целата јавност одеднаш. Ако ништо не ѝ кажеше на јавноста и ако им кажеше на петмина од своите најдобри пријатели, „Ќе ја олеснам ситуацијата со тарифи – треба да купите, тоа би било нелегално“.
Ситуацијата чека разрешница.
