Моделот „Nissan GT-R“ не е мртов, барем според шефот на компанијата Иван Еспиноза.
Долгогодишниот извршен директор на „Nissan“ јасно стави до знаење дека компанијата останува посветена на перформансите на автомобилите во својата постава, а тоа го вклучува и новиот „GT-R“. Сепак, останува отворено прашање дали следната генерација „R36“ ќе ги задржи своите „SUS“ корени или ќе премине кон електрификација.
„R35 GT-R“ е на пазарот од 2007-ма година, што го прави еден од најдолгите модели со перформанси во последно време. Но, со крајот на производството, ентузијастите се прашуваа дали ќе опстане во друга варијанта.
Еспиноза ги отфрли сите тие грижи во интервју за „Automotive News“, велејќи: „Ние ќе продолжиме да работиме на спортски автомобили. Ова е дел од нашата ДНК. Не можам да ви кажам кога и како, но се разбира, ‘GT-R’ ќе постои во иднина“.
Еспиноза истакна дека „Nissan“ ќе одржи стабилен број на „четири или пет“ иконски модели, вклучувајќи ги „Z“, „GT-R“ и потенцијално обновената „Silvia“.
Тој истакна дека неговата длабока страст за спортските автомобили на „Nissan“, која датира од неговото детство со „300ZX“, сугерира дека нема да го пушти „GT-R“ да си оди.
Погонската единица што ќе ја има следниот „GT-R“ е сè уште мистерија. „Nissan“ во последно време навестува електрична иднина, а Еспиноза претходно ги спомна придобивките од „EV“ спортските автомобили.
„Nissan“ го покажа и концептот „Hyper Force“, радикален „EV“ со два мотори и импресивни 1.340 коњски сили. Иако серискиот „R36“ веројатно нема да биде толку екстремен, јасно е дека „Nissan“ размислува за електричен „GT-R“.
