Загрижувачки податоци објави Државниот завод за статистика. Една од причините што Македонија е се повеќе зависна од увоз на храна е тоа што се помалку таа се произведува во земјава. Освен драматичниот континуиран пад на растителната храна, сега податоците на статистичарите откриваат и драстичен пад на вкупниот број на добиток и живина. Тоа го отвора прашањето, дали и во иднина треба да се очекува понатамошен раст на цените на месото и преработките од месо.
Во Македонија во шталите во 2024 година се регистрирани речиси 144 илјади говеда. А тоа е намалување на годишно ниво за 2,3 отсто. Извештајот на статистика покажува дека има намалување и кај бројот на свињите. Пад е забележан и кај бројот на овците, а има зголемување сепак кај бројот на козите. За речиси 10 отсто се намалил бројот на живина на годишно ниво кој се чува во државава.
„Во 2024 година, во споредба со 2023 година, вкупниот број говеда е намален за 2.3 %. Намалување на бројот на говедата е забележано кај индивидуалните земјоделски стопанства, како и кај деловните субјекти. Бројот на свињите во 2024 година, во споредба со 2023 година, е намален за 7.1 %. Зголемување на бројната состојба на свињите за 27.1 % е забележано кај деловните субјекти. Вкупниот број овци во 2024 година бележи пад од 11.9 %. Во истиот период, бројот на козите бележи пораст за 14.5 %. Бројот на живината во 2024 година, во споредба со претходната година, е намален за 9.9 %“, стои во извештајот на ДЗС.
Во последниве неколку години цената на свежото месо постојано растеше. За две години цената на свежото месо, без разлика дали е свинско, телешко или пилешко е зголемена за најмалку 25 отсто. По повисока цена од пред две години се продваат и преработките од месо, сувомеснатите производи станаа луксиз на трпезата. Слично е и со сирењето особено овчото и кашкавалите кои се продаваат по двојно повисоки цени од пред две години. Енормно висок скок има и кај цената на јајцата.
Ваквите ценовни турбуленции се резултат на намаленото производство во земјоделството и сточарството. Од држава која беше препознатлива по домашното производство и која ја ранеше половина поранешна Југославија, сега Македонија се претвори во земја која нема доволно жито, пченица, млеко, месо и останати основни суровини потребни за своите граѓани.
И.П
