Социјалната мрежа X на Илон Маск е на пат да го објави својот прв раст на приходите од реклами откако милијардерот ја купи компанијата во 2022 година, покажаа податоците од истражувачката компанија Emarketer.
Големите брендови се враќаат на X исто како што расте политичкото влијание на Маск во администрацијата на американскиот претседател Доналд Трамп. Како сопственик на Tesla, Маск сега игра клучна улога во американското Министерство за владина ефикасност, што дополнително ја зголемува неговата моќ во деловните кругови, пренесува Reuters.
Приходите од рекламирањето на платформата X во САД ќе пораснат за 17,5 проценти на 1,31 милијарди долари, додека глобалните приходи ќе пораснат за 16,5 проценти на 2,26 милијарди долари, според Emarketer.
X успеа да привлече мали и средни бизниси, иако претходно имаше проблеми со овој сегмент од пазарот. X се натпреварува со платформи како Instagram (сопственост на Meta) и TikTok, кои се борат за поголем дел од пазарот на рекламирање. Американските тарифи и економската несигурност би можеле да влијаат на распределбата на буџетите за рекламирање.
Мофет Натансон во понеделникот ја намали прогнозата за раст на рекламирањето во САД од 6,9 отсто на 5,8 отсто, повикувајќи се на хаотични промени во политиката од страна на новата администрација. И покрај очекуваниот раст, X сепак заработува помалку отколку пред купувањето на Маск. Како приватна компанија, X не открива финансиски податоци, но во 2021 година, Twitter имаше 4,51 милијарди долари приходи од реклами додека сè уште беше на берзата.
