„Prada“ е се поблиску до договор за купување на „Versace“ од „Capri Holdings“, откако се согласи на цена од речиси 1,5 милијарди евра, тврди „Bloomberg“, повикувајќи се на информирани извори.
Миланските „Prada“ и „Capri Holdings“ би можеле да го финализираат договорот за италијанскиот производител на луксузна облека овој месец, рекоа изворите, кои побараа да не бидат именувани бидејќи разговорите се доверливи. Разговорите напредуваат откако првичната проверка не откри ризици, додаваат тие.
Времето и проценката може да се променат и преговорите да пропаднат, додаваат тие. „Capri“, кој го купи „Versace“ во 2018-та година за околу 1,8 милијарди евра, не одговори веднаш на барањата за коментар во неделата. „Prada“ одби да коментира.
Акциите на „Prada“ се зголемија за 4,1% во понеделникот во Хонг Конг, каде акциите беа котирани во 2011-та година, што ја истакнува важноста на кинескиот пазар.
Потенцијалната аквизиција на модната куќа, основана од покојниот дизајнер Џани Версаче во 1978-ма година, ќе и овозможи на „Prada“ да создаде поголем италијански играч кој би можел подобро да се натпреварува со глобалните групи за луксузни стоки како што се „LVMH“ и „Kering“.
Купувањето ќе го смени деценискиот тренд на италијанските модни групи, вклучувајќи ги „Gucci“ и „Valentino“, кои беа преземени од странски конкуренти.
„„Prada“ ќе биде добро позиционирана да го реализира потенцијалот на брендот „Versace“ на долг рок, со шанса да го отвори патот кон групацијата да стане италијански одговор на француските луксузни конгломерати“, велат аналитичарите на „UBS Group“ во белешката од 28-ми февруари.
„Prada“ се појави како еден од победниците во луксузниот сектор среде глобалниот пад на модните стоки од високата класа. Во третиот квартал од минатата година, неговата продажба порасна благодарение на брендот „Miu Miu“, популарен меѓу помладите потрошувачи.
Италијанската компанија помина неколку недели оценувајќи го „Versace“ со своите консултанти, добивајќи ексклузивен пристап до финансиските и продажните податоци, објави „Bloomberg News“ во февруари, повикувајќи се на извори запознаени со ова прашање.
Дури и ако се постигне договор, „Prada“ ќе вреди само мал дел од вредноста на нејзините најголеми конкуренти. Пазарната капитализација на модната куќа е околу 175 милијарди долари од Хонг Конг (22,5 милијарди американски долари), а нејзините акции се зголемија за 14% од почетокот на годината. Семејството на Муча Прада и нејзиниот сопруг Патрицио Бертели контролираат околу 80% од компанијата.
Според изјавата на „Versace“ за третиот квартал од тековната фискална година, пријавени се приходи од 193 милиони долари, што претставува пад од 15% на годишно ниво. Во истиот период, оперативната загуба на брендот се зголеми од 14 милиони долари до 21 милион долари.
