Илон Маск изгуби 52 милијарди долари во нето богатство од почетокот на годината, но сепак е убедливо најбогатиот човек во светот, според индексот на милијардери на Блумберг.
Акциите на Tesla паднаа за осум отсто во вторникот пред затворањето на берзата, а во текот на изминатиот месец забележаа пад од над 20 отсто. Пазарната вредност на Tesla падна под 1 трилион долари за прв пат од ноември 2024 година, пишува CNN.
Продажбата на Tesla е во сериозен, невиден пад, а продажбата само во Европа падна за 45 отсто минатиот месец, и покрај популарноста на електричните возила на тој пазар, според Европската асоцијација на производители на автомобили. Иако Маск е фигура која предизвикува поделби, не е јасно дали неговите политички ставови треба да бидат директно поврзани со овој пад на продажбата.
Други клучни фактори се зголемената конкуренција, особено во Кина, и забавувањето на побарувачката во САД. Падот на акциите на Tesla означува остра промена во расположението на инвеститорите во споредба со ноември 2024 година, веднаш по победата на Доналд Трамп на претседателските избори во САД. Во тоа време, Маск достигна рекордно богатство од 347,8 милијарди долари благодарение на континуираниот раст на акциите на Tesla.
Инвеститорите веруваа дека влијанието на Маск во администрацијата на Трамп ќе донесе бран на дерегулација што ќе биде од корист за Тесла. Како најголем поединечен акционер на Tesla, Маск стана побогат за околу 83 милијарди долари само во ноември. Блиската соработка на Маск со Трамп ги доведе неговите проекти во прв план.
Покрај тоа што е извршен директор на Tesla и SpaceX, Маск е сопственик на платформата X и директор на неколку други компании, вклучувајќи ги Neuralink, xAI и The Boring Company. Тој во моментов го предводи и новоформираниот Оддел за владина ефикасност (DOGE), каде што спроведе низа контроверзни отпуштања и намалувања на бројот на вработени во федералните агенции.
Богатството на Маск падна за 5,2 милијарди долари само минатата недела, според најновото ажурирање на BBI. И покрај ова, тој сè уште го држи убедливото прво место со нето вредност од 380 милијарди долари, што е 144 милијарди долари повеќе од второпласираниот Марк Цукерберг, извршен директор на Мета.
