Американскиот Apple планира 20.000 нови работни места и инвестиција од 500 милијарди долари во САД.
Американската технолошка компанија Apple планира да отвори 20.000 нови работни места во САД и да инвестира 500 милијарди долари во земјата во следните четири години.
Компанијата од Купертино соопшти дека ќе започне со производство на сервери за вештачка интелигенција за својот Apple Intelligence систем во Хјустон, Тексас, во соработка со Foxconn.
Apple ќе го прошири и постоечкиот капацитет на своите центри за податоци во Аризона, Орегон, Ајова, Невада и Северна Каролина, пишува Bloomberg.
„Ќе продолжиме да работиме со луѓе и компании низ оваа земја за да помогнеме да се напише извонредно ново поглавје во историјата на американските иновации“, рече извршниот директор на Apple, Тим Кук.
Оваа најава доаѓа неколку дена по средбата на американскиот претседател Доналд Трамп и Кук во Белата куќа.
По состанокот, Трамп изјави дека Кук ќе инвестира стотици милијарди долари во САД и навести дека Apple сака да избегне царини за кинески стоки со овие инвестиции.
Повеќето од iPhone-ите и другите производи на Apple се произведени во Кина.
За време на првиот мандат на Трамп, Кук успеа да го убеди американскиот претседател да не воведува царини за iPhone-и, тврдејќи дека таквиот потег ќе ги зајакне конкурентите како јужнокорејскиот Samsung.
Apple, исто така, најави локални инвестиции во САД во тоа време, а се чини дека има слична стратегија и овој пат, додава њујоршката агенција.
Тим Кук присуствуваше на претседателската инаугурација на Трамп во Вашингтон.
