„BMW“ го претстави експерименталниот електричен автомобил наречен „Vision Driving Experience“, кој е опремен со својот компјутер „Heart of Joy“.
„Heart of Joy“ е „мозокот“ на идните модели на „Neue Klasse“, од кои првиот ќе влезе во масовно производство подоцна оваа година, во фабриката во Дебрецен, Унгарија.
Од „BMW“ велат дека „Heart of Joy“ ги комбинира возењето, сопирањето, регенерацијата, полнењето и контролата на управувањето во еден единствен систем, кој е 10 пати побрз од претходните независни контролни единици.
Ова значи дека следната генерација на електричните модели на „BMW“ ќе се движат попрецизно и постабилно во свиоците и ќе бараат помал придонес од возачот.
Зголемената процесорска моќ ќе овозможи и поефикасно користење на енергијата. „BMW“ тврди дека напредниот регенеративен систем за сопирање ја подобрува ефикасноста за 25 проценти, а во повеќето ситуации можеби воопшто не се потребни механички сопирачки.
„BMW Vision Driving Experience“ не е наменет за производство, туку претставува тест платформа за нови технологии.
„BMW“ конкретно тестира дали електрониката може да издржи 18.000 Nm вртежен момент, што е колосална бројка. Прототипот ја демонстрира работата на компјутерот „Heart of Joy“ користејќи боја на бандажите. Забрзувањето е прикажано во зелено, обновувањето на енергијата во сино, а сопирањето со помош на сопирачки за триење во портокалово.
„BMW Vision Driving Experience“ ќе ја има својата официјална светска премиера на Саемот за автомобили во Шангај, кој ќе се одржи од 23-ти април до 2-ри мај.
