Израелскиот премиер Бенјамин Нетанјаху денеска се закани дека ќе се повлече од примирјето во Појасот Газа и ќе ја продолжи војната против Хамас доколку милитантната група не ослободи нови заложници во сабота, како што е планирано според условите на мировниот договор.
Хамас во понеделникот соопшти и повтори денеска дека планира да го одложи ослободувањето на уште тројца заложници, откако го обвини Израел дека не ги исполнил условите од прекинот на огнот, вклучително и недозволувањето доволно шатори и друга хуманитарна помош во Газа.
Претходно денеска, израелски официјален претставник изјави дека Нетанјаху и наредил на војската да испрати повеќе војници во и околу Појасот Газа. Нетанјаху, исто така, им нареди на официјалните лица „да се подготват за секое сценарио доколку Хамас не ги ослободи нашите заложници оваа сабота“, додаде функционерот, кој побара да остане анонимен.
Американскиот претседател Доналд Трамп го охрабри Израел да повика на ослободување на уште заложници, но не беше веднаш јасно дали заканата на Нетанјаху се однесуваше на ослободување на сите преостанати заложници во Газа или само на тројцата планирани за ослободување во сабота.
Хамас досега ослободи 21 заложник во серијата размена на стотици палестински затвореници.
За време на првата шестнеделна фаза од прекинот на огнот, Хамас вети дека ќе ослободи 33 заложници заробени во нападот врз Израел на 7 октомври 2023 година, додека Израел рече дека ќе ослободи речиси 2.000 палестински затвореници. Страните направија пет размени од 19 јануари.
Војната би можела да продолжи на почетокот на март, доколку не се постигне договор за покомплицираната втора фаза од прекинот на огнот, што ќе бара враќање на сите преостанати заложници и неодредено продолжување на прекинот на огнот.
