Астрономите внимателно ги следат астероидите и нивните траектории со цел навреме да препознаат дали некој од нив ќе ја загрози Земјата. Неодамна, астроном аматер од Турција беше убеден дека пронашол нов астероид кој може да се доближи до Земјата, но на крајот се покажа дека тоа не е астероид, туку Роудстерот на Маск, кој беше лансиран на крајот на минатата деценија како дел од мисија за тестирање ракета на SpaceX.
Иако Роудстерот не претставува закана, неодамна беше откриен астероид кој всушност би можел да ја погоди Земјата за само осум години. Овој астероид беше откриен на крајот на минатата година, а во текот на следните недели научниците спроведоа бројни симулации на неговото движење кои укажуваа на потенцијална опасност.
Според сегашните пресметки на астрономите, астероидот наречен 2024 YR4, со големина помеѓу 40 и 100 метри, има 1,3 отсто шанси да удри во нашата планета, а датумот кога тоа би можело да се случи е веќе познат – 22 декември 2032 година. Астрономите ќе продолжат да го следат астероидот и треба да дознаат повеќе за него во 2028 година кога 2024 YR4 повторно ќе помине во близина на нашата планета.
Како што е соопштено, астероид со оваа големина сигурно нема да предизвика апокалипса како онаа што се случи пред 66 милиони години кога ударот на вселенски објект доведе до истребување на диносаурусите, но тие велат дека може да ги „избрише градови „ако падне врз нив. Научниците го споредуваат со астероид кој падна пред повеќе од еден век во централен Сибир, во близина на реката Тунгуска и кој зад себе остави околу 60 милиони уништени дрвја, а имаше и човечки жртви.
Нема причина за паника
Иако звучи загрижувачки фактот дека Земјата се соочува со реална опасност од вселената која може да уништи градови во следната деценија или, доколку падне во морето, да предизвика цунами, нема причина за паника. Шансите за удар се уште се многу мали, а додека научниците ја проучуваат неговата траекторија, може да испадне дека YR4 нема да се приближи толку блиску до нашата планета и дека не претставува никаква опасност. Засега се уште е прв на листата на астероиди кои ги надгледува Европската вселенска агенција и на т.н. Торинска скала, која укажува на потенцијална закана од удар на астероид, е означена со бројот 3 од 10.
Со текот на времето, астрономот Ричард Бинзел од MIT, кој ја создал Торинската скала, верува дека оваа бројка може да падне на еден или дури и на нула, што би значело дека сепак нема реална опасност од овој астероид. „Ловецот на астероиди“ Дејвид Ранкин се согласува, објаснувајќи дека орбитата на астероидот сè уште е нејасна, што го отежнува точно да се одреди дали Земјата навистина е на нејзиниот пат, но моментално се чини дека ќе ја пропушти нашата планета.
