Извозот на руски природен гас преку гасоводот од советската ера што минува низ Украина до Европа беше запрен во раните утрински часови на Новата година, откако истече договорот за транзит и завојуваните Москва и Киев не постигнаа договор за продолжување на протокот.
Затворањето на најстарата руска рута за гас за Европа стави крај на деценијата на затегнати односи предизвикани од руското заземање на Крим во 2014 година. Украина престана да купува руски гас следната година.
-Го запревме транзитот на руски гас. Ова е историски настан. Русија ги губи пазарите, ќе трпи финансиски загуби. Европа веќе донесе одлука да се откаже од рускиот гас – изјави украинскиот министер за енергетика Херман Галушченко.
Запирањето на протокот на гас се очекуваше во услови на војна, која започна во февруари 2022 година. Украина беше категорична дека нема да го продолжи договорот поради воениот конфликт.
Според извор од индустријата, минатата година Газпром претпостави дека нема транзит на гас преку Украина, што претставуваше приближно половина од вкупниот извоз на руски гас во Европа.
Русија продолжува да извезува гас преку гасоводот Турски тек на дното на Црното Море. Турски тек има две линии – едната за домашниот пазар на Турција, а другата за снабдување на клиенти во Централна Европа, вклучувајќи ги Унгарија и Србија.
Европската унија ги удвои напорите да ја намали својата зависност од руската енергија по избувнувањето на воениот конфликт во Украина во 2022 година, барајќи алтернативни извори. Останатите купувачи на руски гас преку Украина, како Словачка и Австрија, исто така се договорија за алтернативни испораки.
Молдавија, некогаш дел од Советскиот Сојуз, е една од најтешко погодените земји. Велат дека сега ќе треба да воведе мерки за намалување на потрошувачката на гас за една третина.
Немаше коментар од Европа во раните утрински часови во средата.
