Од денес, мобилните телефони и другите мали електронски уреди, освен лаптопите, што се продаваат во ЕУ мора да имаат еден полнач со влез USB-C. Европската комисија подготви предлог за воведување на еден полнач во 2021 година.
Според првичниот план, новите правила треба да стапат на сила кон средината на оваа година, но примената е малку одложена.
Европскиот парламент и Советот на ЕУ го поддржаа предлогот со големо мнозинство гласови. Во образложението, меѓу другото, наведоа дека стандарден полнач за сите електронски уреди – покрај телефони, таблети, електронски читачи, дигитални камери, слушалки, рачни конзоли за видео игри и преносни звучници – ќе ја намали количината на електронски отпад.
Во согласност со правилата на ЕУ, потрошувачите нема да мора да земаат нов полнач со секој купен уред.
Претседателката на Комитетот за внатрешен пазар и заштита на потрошувачите на Европскиот парламент, Ана Кавацини, соопшти дека ова е „решителен чекор кон удобноста на потрошувачите и одговорноста за животната средина“.
Меѓу производителите кои најдолго го одложија претставувањето на USB-C конекторот е американскиот технолошки гигант Apple, кој тоа го направи минатата година.
Новите правила се уште не важат за производителите на лаптопи. Тие ќе стапат на сила на 28 април 2026 година.
