Украинските сили заробиле ранет севернокорејски војник кој се борел на страната на Русија во војна која се приближува на третата година, соопшти во петокот јужнокорејската разузнавачка агенција.
Се верува дека тоа е првиот севернокорејски воен заробеник од декември, кога Пјонгјанг испрати сили да им помогнат на Русите во нивната војна против Украина.
Пред објавата од Сеул, на каналот Телеграм беше објавена фотографија на која наводно се гледа ранет севернокорејски војник.
Не е јасно каде точно е фатен.
Северна Кореја испратила повеќе од 10.000 војници да и помогнат на Русија, според Киев, Сеул и НАТО, иако Москва и Пјонгјанг ниту ја потврдија ниту ја демантираа оваа информација.
„Ова е прво во серијата фаќања“, изјави за Би-Би-Си Јанг Ук, научен соработник во Институтот за политички студии Асан.
South Korea's National Intelligence Service (NIS) confirmed that Ukraine captured a wounded North Korean Soldier, marking the first known instance of a North Korean Combatant being seized. The Soldier was reportedly captured by Ukrainian Forces in Russia's Kursk Region, as… pic.twitter.com/bzqcjMUfov
— OSINTdefender (@sentdefender) December 27, 2024
„Покорисно е за Украинците да заробат севернокорејски војници и да се обидат да ги разменат со Русите за украински воени заробеници“, смета тој.
Неодамнешните фотографии од бојното поле ги потврдија шпекулациите дека „севернокорејските војници во голем број се ставени под руска команда“, рече Јанг.
Сепак, тој додаде дека „за нив ќе биде предизвик да ја докажат својата севернокорејска националност“.
Украинските сили велат дека на севернокорејските војници им биле издадени лажни руски лични карти, додека украинскиот претседател Володимир Зеленски минатата недела објави видео на кое се гледа како руските војници ги палат лицата на убиените Севернокорејци за да го сокријат нивниот идентитет.
Украинското и јужнокорејското разузнавање соопштија дека многу севернокорејски единици, некои од најдобрите што ги има Северна Кореја, се наоѓаат во Русија.
Наводно, во Русија биле испратени членови на 11-тиот корпус, познат и како корпус на бура.
Единицата е обучена за инфилтрација и инфраструктурна саботажа.
Во понеделникот, Зеленски тврдеше дека повеќе од 3.000 севернокорејски војници се убиени или ранети во борбите во рускиот регион Курск досега.
Украинските единици ненадејно го нападнаа тој руски пограничен регион во август, и оттогаш борбите и обидите на Русите да ги турнат во Украина продолжуваат таму.
Јужнокорејското разузнавање процени дека во борбите досега се убиени околу 100 севернокорејски војници, а ранети се уште околу 1.000.
Русија започна инвазија на Украина во февруари 2022 година.
Неодамнешното распоредување на севернокорејски трупи во Русија се толкува како знак за растечкиот сојуз меѓу Москва и Пјонгјанг.
Развојот, кој доаѓа додека Северна Кореја ги подигнува тензиите со Јужна Кореја, ја зголеми загриженоста на Западот.
Кина, долгогодишен сојузник и на Русија и на Северна Кореја, исто така внимателно го следи зајакнувањето на пријателството меѓу Москва и Пјонгјанг.
