Бруто домашниот производ (БДП) по жител, според стандардот на куповна моќ, во Македонија лани изнесувал 41 отсто од просекот на ЕУ, покажуваат конечните податоци на Евростат.
Од земјите членки на ЕУ, највисок БДП по жител, според стандардот на куповна моќ, е забележан во Луксембург, чие ниво е повеќе од двапати од просекот на ЕУ и е 237 отсто од европскиот просек.
Бугарија е на најниско ниво со 64 отсто од просекот на ЕУ.
Од земјите во регионот, Хрватска има највисок БДП по глава на жител според стандардот за куповна моќ, што е 76 отсто од просекот на ЕУ, додека Црна Гора е на второ место со 51 отсто од просекот на ЕУ. Србија е на ниво од 49 отсто од европскиот просек, додека Босна и Херцеговина и Албанија се на ниво од 36 отсто од европскиот просек.
Реалната индивидуална потрошувачка по глава на жител според стандардот за куповна моќ, според конечните податоци, меѓу земјите-членки се движеше од 70 отсто од просекот на ЕУ во Бугарија и Унгарија до 136 отсто од просекот на ЕУ во Луксембург.
БДП по глава на жител е главно показател за нивото на економска активност, додека реалната индивидуална потрошувачка е алтернативен показател, подобро прилагоден за да ја опише материјалната благосостојба на домаќинството.
