Со стартот на „Новогодишната кошница“, која од 15 декември е официјално во сила, граѓаните веќе тргнаа со своите списоци од маркет до маркет, барајќи најдобри цени за основните производи.
Акцијата која има за цел да обезбеди поевтини прехранбени производи за празниците е дел од владините мерки за ублажување на ценовните притисоци врз домашниот буџет, но граѓаните се сè уште скептични дека ќе видат значителна разлика во цените.
Листата на производи која првично беше ограничена, во последниве денови значително се прошири и достигна 1.036 артикли.
Сепак, како што велат надлежните, ова не е конечен број, бидејќи на иницијативата продолжуваат да се приклучуваат нови производители и дистрибутери.
Досега, акцијата ја поддржале над 90 компании, а нивните производи можат да се најдат во 38 синџири на маркети низ целата држава.
И покрај оптимистичките најави, многу граѓани кои веќе ги посетиле маркетите велат дека не ги забележале најавените намалувања.
„Не забележувам никаква разлика во цените. Дури напротив, на некои производи цените се и повисоки од претходно. Празниците ни се ближат, а планирањето на семејната трпеза станува вистински предизвик,“ изјави Драган Димовски, жител на Скопје, кој пазаруваше во еден од поголемите маркети.
На ваквите забелешки реагираат и трговците, кои велат дека мерката стапила во сила во недела, што им оставило малку време за прилагодување на цените.
„Работиме со полна пареа за да ги усогласиме сите артикли од листата. Некои од цените се веќе коригирани, но процесот е во тек. До крајот на неделата, очекуваме да биде сè ажурирано“, вели Марија К., менаџерка на еден локален супермаркет.
Во меѓувреме, експертите предупредуваат дека мерките како „Новогодишната кошница“ имаат краткорочен ефект и не можат целосно да ја компензираат инфлацијата и растечките трошоци за живот.
„Ова е привремено решение. Потребни се структурни реформи и мерки кои ќе доведат до стабилизација на пазарот и зајакнување на куповната моќ на граѓаните,“ изјави економскиот аналитичар Ведран Кузмановски.
Додека властите најавуваат дека ќе продолжат да ја следат ситуацијата и да воведуваат нови мерки, граѓаните остануваат внимателни и со тетратка во рака, во потрага по најдобрите понуди.
Се чини дека новогодишниот дух и празничната еуфорија оваа година се ставени на тест пред преполните полици и променливите цени.
Б.З.М.
