Новиот шеф на Белата куќа, Доналд Трамп, им предложил на членките на Европската унија да испратат свои мировни сили во Украина, со цел да се следи потенцијалниот прекин на огнот со Русија, објави вчера американскиот конзервативен деловен дневен весник „Волстрит журнал“. повикувајќи се на извори.
Републиканскиот лидер неодамна, за време на состанокот со претседателите на Франција и Украина, Емануел Макрон и Владимир Зеленски, наводно во Париз посочил дека Европа треба да игра голема улога во следењето на прекинот на непријателствата и истакна дека американските војници нема да бидат вклучени во оваа акција. Според Трамп, заштитата и поддршката на Украина треба да бидат приоритет на европските земји.
Идниот станар на Белата куќа нагласи и дека САД се подготвени да ги поддржат постигнатите договори, но дека нема планови за директно вклучување на американската војска. Трамп, исто така, ги охрабрил европските претставници да побараат од Кина да изврши притисок врз Русија да го прекине конфликтот во Украина, според извори на американскиот весник. Тој го наведе воведувањето трговски тарифи против Кина како лост за спроведување на овој план, доколку Пекинг одбие да го олесни мирното решение.
Разговорите за овој план се уште се во рана фаза, додека одговорите на прашањата кои земји би биле вклучени во мировната операција, со колку војници и каква улога би имале САД во поддршката на оваа операција, засега остануваат отворени. Исто така, се истакнува дека хипотетичката мировна или набљудувачка мисија во Украина нема да биде под команда на НАТО, туку ќе вклучува војници од земјите-членки на блокот предводен од САД, според неименувани официјални лица, кои признаа дека не се сигурни дека Русија ќе го прифати тоа.
Во меѓувреме, генералниот секретар на НАТО Марк Руте ги покани лидерите на Велика Британија, Франција, Германија, Италија и Полска да се сретнат со Зеленски во Брисел за да разговараат за безбедносните гаранции за Киев, изјавија двајца официјални лица за американскиот весник. Изворите, сепак, тврдат дека Трамп во моментов не е врзан за некој конкретен план за завршување на конфликтот во Украина и дека не размислувал интензивно за ова прашање додека се подготвува да ја преземе претседателската функција на 20 јануари.
Лидерот на републиканците за време на претседателската кампања најави дека доколку добие втор мандат, ќе стави крај на конфликтот во Украина и постојано ја критикуваше американската помош за Киев.
