„Apple“ планира да понуди сателитско поврзување во својот нов паметен часовник во 2025-та година и ја подобрува функцијата за мерење на крвниот притисок. Така, ќе се обиде да привлече туристи и потрошувачи кои се свесни за здравјето да купат нови уреди, пишува „Bloomberg“.
Сателитските можности се планирани да бидат вклучени во „Apple Watch Ultra“ следната година – врвниот модел на компанијата, велат извори запознаени со ова прашање. Технологијата ќе им овозможи на корисниците на паметни часовници да испраќаат текстуални пораки офлајн користејќи поврзување со сателитите на „Globalstar“ кога немаат мобилна или „Wi-Fi“ конекција.
Другата функција, која ќе следи дали корисниците на „Apple Watch“ имаат висок крвен притисок, би можела да се појави и во 2025-та година, додаваат изворите, кои сакаа да останат анонимни бидејќи информациите се доверливи. Овие цели беа одложувани и претходно. „Apple“ сакаше да ја објави оваа функција уште минатата година.
Технологијата ќе го зајакне еден од најголемите напори на „Apple“ под раководството на извршниот директор Тим Кук – зајакнување на здравствените карактеристики и безбедноста на производите. Компанијата сè повеќе ги промовираше своите часовници и телефони како уреди за спасување живот, а најновите функции би можеле да ја зајакнат таа точка.
Претставник на компанијата со седиште во Калифорнија одби да коментира за ова прашање.
„Apple“ лансираше функција за сателитска комуникација уште во 2022-ра година на „iPhone 14“. Им овозможува на корисниците да контактираат со службите за итни случаи дури и ако немаат опсег. Оваа опција беше продолжена минатата година за да се овозможи контакт со организациите за помош на пат. Оваа година, „Apple“ повторно ја надгради функцијата за да им овозможи на луѓето да ја користат за да испраќаат пораки до секого преку „iMessage“.
Но, тоа значи дека планинарите и другите љубители на спортови на отворено сè уште треба да го носат својот „iPhone“ за да ја користат технологијата. Сега се што им треба е часовникот.
„Apple Watch Ultra“ ќе биде првиот мејнстрим паметен часовник со сателитски способности. Овој потег може да им даде на потрошувачите помалку причини да користат самостојни сателитски комуникациски алатки како „Garmin’s inReach“.
