Новоизбраниот претседател на САД, Доналд Трамп, именуваше застапник за криптовалути за следен шеф на Комисијата за хартии од вредност(SEC) на САД, со што биткоинот за прв пат го турка над 100.000 долари, бидејќи трговците позитивно реагираа на изгледите за олеснување на регулативите.
Најпознатата криптовалута поскапе за 6,1 отсто на 103.801 долари во четвртокот наутро (по европско време), пред да се стабилизира на 103.420 долари околу 13:23 часот по Сингапур, според Блумберг. Во моментов, еден биткоин вреди нешто помалку од 102.000 долари.
Вкупниот пазар на криптовалути порасна за приближно 1,3 трилиони долари од победата на Трамп на изборите на 5 ноември, чија агенда вклучуваше поддршка за секторот на криптовалути.
Трамп го избра Пол Аткинс да го замени претседателот на Комисијата за хартии од вредност (SEC) во заминување, Гери Генслер, кој ги заостри регулативите за дигиталните средства по падот на пазарот во 2022 година.
„Ова е раст управуван од моментумот“, изјави за Bloomberg Џејсон Титман, извршен директор на крипто брокерската компанија Swyftx. „Глобалниот обем на тргување ги надминува нивоата на пандемијата, а назначувањето на Пол Аткинс за претседател на (SEC) само ја зголеми еуфоријата“.
Биткоинот беше за 300 долари под 100.000 долари на 22 ноември, но потоа забележа пад, иако остана блиску до тоа ниво. Поддржувачите на криптовалутите ја гледаат бројката како потврда дека биткоинот е модерно складиште на вредност и заштита од инфлација, додека критичарите тврдат дека дигиталното средство нема основна вредност и е премногу отворено за шпекулации.
Американските фондови поврзани со биткоин привлекоа нето прилив од околу 32 милијарди долари оваа година, вклучително и повеќе од 8 милијарди долари откако Трамп стана новоизбран претседател, според податоците на Блумберг.
Вкупниот обем на тргување со дигитални средства и деривати достигна рекордни 10 трилиони долари минатиот месец.
Трамп вети дека ќе ги укине ограничувањата за дигиталните средства од администрацијата на Бајден, ќе инсталира пријателски регулатори и ќе ги трансформира САД во глобален центар за криптовалути.
Пазарот на криптовалути надвор од Биткоин забележа мешан тренд – Dogecoin се зголеми, етерот остана стабилен, додека XRP забележа пад.
