Илон Маск сега и официјално е најбогатиот човек досега и постави нов рекорд, според пресметките на Форбс. Најбогатиот човек на планетата стана уште побогат благодарение на порастот на вредноста на акциите на Tesla, компанијата за електрични возила со која раководи, сето тоа по изборната победа на неговиот близок соработник Доналд Трамп.
Нето богатството на Маск достигна рекордни 321,7 милијарди долари на затворањето на пазарот во петокот, што е раст од 7 милијарди долари. Акциите на Tesla пораснаа за 3,8%, достигнувајќи ново 3,5-годишно ниво од 352,56 долари по акција.
Тоа го надмина претходниот рекорд од 320,3 милијарди долари, поставен на 5 ноември 2021 година за време на пандемијата.
Близу 335 милијарди
Покрај тоа, вредноста на генеративната компанија за вештачка интелигенција xAI на Маск порасна на 50 милијарди долари, според Wall Street Journal. Ова го направи Маск побогат за дополнителни 13 милијарди долари, зголемувајќи ја неговата нето вредност на 334,3 милијарди долари (Маск поседува 60% од оваа компанија за вештачка интелигенција).
Маск повторно е сопственик на највисокото богатство кое Форбс некогаш го следел, надминувајќи го рекордот што го постави во 2021 година.
Неговото богатство сега е околу 70 милијарди долари поголемо отколку што беше на денот на изборите, бидејќи акциите на Tesla пораснаа за 40%. Волстрит е уверен во поповолна регулаторна средина за Тесла под администрацијата на Трамп, особено за нивните автономни возила.
Маск, кој пред само шест месеци беше „тежок“ со помалку од 200 милијарди долари, сега има богатство кое е повеќе од 80 милијарди долари поголемо од богатството на следниот најбогат човек, неговиот пријател и претседател на Оракл, Лери Елисон. Неговото богатство е 235 милијарди долари.
Tesla, SpaceX, Neuralink, X
Голем дел од богатството на Маск доаѓа од неговите 13 проценти од акциите во Tesla, во вредност од 145 милијарди долари. Тој, исто така, има дополнителен бонус од 9% сопственост во компанијата, што во моментов е предмет на жалба пред судот во Делавер (Форбс го вреднува овој бонус со 50% попуст).
Друг клучен извор на богатството на Маск е неговиот удел од 42% во SpaceX, кој беше проценет на 210 милијарди долари во јунскиот круг за откуп на акции. Тоа го прави уделот на Маск во приватната воздухопловна и сателитска компанија вреден 88 милијарди долари. Маск поседува и помали удели во други компании, вклучително и Neuralink (компанија за импланти на мозочни чипови) и X (социјалната мрежа порано позната како Twitter).
Богатството на Маск може да добие дополнителни 18 милијарди долари бидејќи се очекува SpaceX да започне нова рунда на откуп на акции следниот месец. Тоа би ја вреднувало компанијата на повеќе од 250 милијарди долари, според извештаите на повеќе медиуми.
Министер за намалување на трошоците
Откако го поддржа Трамп во јули, Маск донираше повеќе од 100 милиони долари за кампањата на Трамп. Тој брзо стана дел од неговиот внатрешен круг, нарекувајќи се себеси „прв пријател“ на Трамп во неодамнешната објава на X. Како неформален „министер за намалување на трошоците“ на Трамп, Маск ќе претседава со новосоздадениот „Оддел за владина ефикасност“ заедно со милијардерот Вивек Рамасвами.
Не е изненадување што вредноста на акциите на Tesla порасна по изборите. Аналитичарите на Волстрит генерално веруваат дека претседателството на Трамп ќе биде корисно за производителот на автомобили. Се очекува намалување на прописите за контроверзната програма за целосно автономно возење.
Акциите на Tesla сè уште се тргуваат за околу 14 отсто под нивниот историски максимум од крајот на 2021 година. Потоа, нето вредноста на Маск го достигна претходниот врв, додека индексот S&P 500 во меѓувреме порасна за 27 отсто.
