Кремљ рече дека одлуката на САД да и дозволи на Украина да користи американско оружје за напади длабоко во Русија ќе ги ескалира тензиите и ќе ги вовлече САД подлабоко во конфликтот.
На редовниот дневен брифинг, портпаролот на Кремљ, Дмитриј Песков, изјави дека нема промена во ставот во однос на она што Владимир Путин го изјави во септември. Рускиот претседател тогаш рече дека нападите со американско оружје на руска територија ќе ги смета за директно учество на НАТО во конфликтот.
Одговарајќи на прашање на агенцијата Тасс, Песков изјави дека Русија е запознаена со наводната одлука на администрацијата на Џо Бајден само врз основа на известувањето на западните медиуми.
„Доколку проектилите испорачани од САД бидат истрелани длабоко во Русија, Москва ќе го разгледа нападот не украински, туку американски“, рече тој.
„Очигледно е дека администрацијата на Бајден во заминување има намера да преземе чекори за да долее масло на огнот и дополнително да ги ескалира тензиите во овој конфликт“, заклучи Песков.
Соединетите Американски Држави први испорачаа ракети ATACMS на Украина пред повеќе од една година – но со услов тие да се користат исклучиво на украинска територија. Украина употреби американски ракети со долг дострел, со дострел до 300 километри, во Бердјанск и Луганск на истокот на земјата, како и на Крим.
Москва илегално го анектираше Крим во 2014 година, а само неколку земји го признаваат тој полуостров како руска територија. Затоа, Крим не потпадна под американското барање Украина да не користи оружје доставено од Вашингтон за напад на руска територија.
Франција и Велика Британија, исто така, донираа проектили, познати како „Storm Shadows“, со исти услови, кои ќе се користат само на територијата на Украина. Сега се очекува тоа ограничување да биде укинато.
