Американскиот претседател во заминување, Џо Бајден, им дозволи на Украинците да го сторат тоа што очајно го бараа со месеци – да напаѓаат цели длабоко во Русија со западни ракети со долг дострел.
Ова за Ројтерс го потврдија три извори запознаени со одлуката. Во тек е значајна промена во американската политика во конфликтот Украина-Русија.
Украина планира да ги изврши првите напади со долг дострел во наредните денови, велат изворите, без да наведат детали поради оперативни безбедносни грижи. Белата куќа одби да ги коментира овие информации.
Потегот на САД – нешто повеќе од два месеци пред новоизбраниот претседател Доналд Трамп да ја преземе функцијата на 20 јануари – беше повлечен по неколкумесечните барања на украинскиот претседател Володимир Зеленски да и дозволи на украинската војска да користи американско оружје за далечни напади врз воени цели длабоко во внатрешноста на Русија.
Промената дојде откако стана јасно дека Русија ги пополнува сопствените сили со севернокорејски војници и ги испраќа во битка против украинската армија. Вклучувањето на Северна Кореја во војната, потсетува Ројтерс, предизвика тревога во Вашингтон и Киев.
Првите напади врз цели длабоко во Русија најверојатно ќе бидат изведени со помош на ракети АТАКМС, кои имаат дострел до 306 километри, велат извори на Ројтерс.
Иако некои американски официјални лица изразија сомнеж дека дозволувањето удари со долг дострел против Русија би можело да го промени текот на војната, одлуката би можела да и помогне на Украина во време кога руските сили остваруваат придобивки и можеби ќе го стави Киев во подобра преговарачка позиција кога и доколку дојде до прекин на огнот.
Не е јасно дали Трамп ќе ја промени одлуката на Бајден кога ќе ја преземе функцијата. Трамп долго време го критикуваше обемот на американската финансиска и воена помош за Украина и вети брз крај на војната, без да објасни како.
Сепак, некои републиканци во Конгресот го повикаа Бајден да ги олабави правилата за тоа како Украина може да го користи оружјето што и е дадено од Америка. Русија предупреди дека ќе го разгледа олабавувањето на ограничувањата за употребата на американско оружје од Украина како голема ескалација.
