Новоизбраниот американски претседател Доналд Трамп разговарал во четвртокот со рускиот претседател Владимир Путин за војната во Украина, објави Вашингтон пост.
Трамп му се јави на Путин од неговото одморалиште на Флорида и го советуваше да не го интензивира конфликтот со Украина. Според извори на „Вашингтон пост“ кои сакале да останат анонимни, Трамп го потсетил Путин на силното американско воено присуство во Европа.
„Разговорот се фокусираше на постигнување мир во Европа, а Трамп изрази интерес за дополнителни разговори за брзо решение на војната во Украина“, тврдат изворите.
Јавните пораки на Трамп за време на изборната кампања предизвикаа метеж во Киев и низ Европа. Трамп вети брзо решавање на војната, но одби да каже чија победа сака. Тој, исто така, ги критикуваше огромните пакети за помош што доаѓаат во Украина од САД. Исто така, Трамп претходно изјави дека веднаш ќе стави крај на војната во Украина, иако не понуди детали како планира да го стори тоа. Тој приватно давал навестувања дека ќе поддржи договор според кој Русија ќе задржи дел од освоената територија, а во разговорот со Путин накратко го спомнал прашањето за територијата, според извори.
Украинската влада била информирана за разговорот со Путин и немала забелешки за нејзино одржување, велат изворите.
Како што пишува Вашингтон пост, првичните разговори на Трамп со светските лидери (десетици од нив) не се водат со поддршка на Стејт департментот и официјални американски преведувачи. Трамп и неговите соработници не им веруваат на владините претставници откако беа обелоденети транскрипти од претседателските повици за време на неговиот прв мандат.
„Претседателот Трамп убедливо победи на историските избори и светските лидери знаат дека Америка ќе се врати на глобалната сцена. Затоа лидерите го започнаа процесот на градење посилни односи со Трамп бидејќи тој претставува глобален мир и стабилност“, рече Стивен Чеунг, директор за комуникации на Трамп.
Разговорот меѓу Трамп и Зеленски, според извори запознаени со детали, траел околу 25 минути. Тоа беше ден пред да разговара со Путин. Откако Зеленски му честиташе на Трамп, новоизбраниот претседател рече дека ќе ја поддржи Украина, но не навлегува во детали.
Тројца извори информирани за повикот изјавија за Аксиос дека Зеленски чувствувал дека повикот поминал добро и не ја зголемил неговата загриженост за победата на Трамп. Еден извор рече дека повикот не „предизвикал чувство на очај“ кај Зеленски.
Маск, исто така, се огласи за време на повикот и рече дека ќе продолжи да ја поддржува Украина преку неговите сателити Starlink, велат изворите. Маск не одговори на барањето за коментар од Аксиос.
„Старлинк“ беше клучен за воените напори на Украина, иако Маск исто така се потсмеваше на барањата на Зеленски за американска помош, а Зеленски го прекори милијардерот откако тој предложи свој мировен план за 2022 година.
Многу останува непознато. Трамп и Зеленски не разговарале за политиките како што е наводниот план на Трамп да стави крај на војната или изгледите за понатамошна американска помош, велат изворите.
Според три извори запознаени со средбата, Трамп му рекол на Зеленски дека нема да ја напушти Украина, но сака да и даде шанса на дипломатијата.
„Ветувам дека ќе бидеш среќен со мене“, му рекол Трамп на Зеленски за време на таа средба, според информиран извор. Кампањата на Трамп одби да го коментира повикот.
„Ништо што Зеленски и неговите соработници го слушнаа приватно од Трамп и неговиот тим не беше алармантно или не натера да се чувствуваме дека Украина ќе биде таа што ќе ја плати цената“, рече извор запознаен со разговорите.
