Новоизбраниот американски претседател Доналд Трамп синоќа објави дека шефицата на кабинетот на Белата куќа ќе биде менаџерката на неговата кампања Сузи Вајлс, доверувајќи ја функцијата на политичкиот оперативец кој му помогна да победи на изборите.
Вајлс ќе биде првата жена на функцијата шеф на кабинетот на Белата куќа.
„Сузи Вајлс ми помогна да ја постигнам една од најголемите политички победи во американската историја и беше составен дел од моите успешни кампањи во 2016 и 2020 година“, се вели во соопштението на Трамп.
„Сузи е цврста, паметна, иновативна и насекаде се восхитуваат од неа и ја почитуваат. Не се сомневам дека ќе ја направи нашата земја горда“, додаде тој.
Шефот на кабинетот обично има големо влијание – управува со персоналот во Белата куќа, го организира времето и распоредот на претседателот и одржува контакт со другите владини оддели и пратеници.
Која е Сузи Вајлс?
Во вчерашниот победнички говор Трамп ја нарече Вајлс „ледената дама“. Таа најмногу работи „во позадина“, изјави новоизбраниот претседател. Како што пренесува Би-Би-Си, таа е позната како една од највлијателните политички оперативци во САД.
Помалку од една година по влегувањето во политиката, таа се приклучи на кампањата на Роналд Реган пред претседателските избори во 1980 година. Таа во 2010 година го претвори Рик Скот, тогаш бизнисмен со мало политичко искуство, во гувернер на Флорида за само седум месеци. Скот сега е американски сенатор.
Вајлс се сретна со Трамп за време на републиканските претседателски прелиминарни избори во 2015 година и стана еден од лидерите на неговата кампања на Флорида. На изборите во 2016 година, тој ја освои таа држава со разлика од 1,6 отсто пред Хилари Клинтон.
Гувернерот на Флорида, Рон Де Сантис, кој две години подоцна ја стави на чело на неговата успешна трка за гувернери, го опиша Вајлс како „најдобар во бизнисот“.
